گوادر کو 100میگاواٹ بجلی کی فراہمی پر پاک ایران معاہدہ طے پا گیا 

اسلام آباد(آئی این پی)پاکستان اور ایران کے درمیان گوادر کو 100میگا واٹ بجلی کی فراہمی کیلئے مفاہمت کی یادداشت پر دستخط کردیئے گئے۔گوادر کو ایران سے بجلی فراہمی کے منصوبے پر بات چیت کا آغاز جون 2022 میں ہوا تھا، معاہدے پر دستخط وزیر توانائی خرم دستگیر کے دورہ ایران کے موقع پر کیے گئے ہیں۔وزارت توانائی کے اعلامیہ میں کہا گیا ہے کہ خرم دستگیر نے ایرانی وزیر توانائی علی اکبر مہرابیان سے بھی ملاقات کی، جس میں دو طرفہ تعلقات اور توانائی کے شعبے میں تعاون بڑھانے پر زور دیا گیا۔اعلامیہ کے مطابق دو نوں وزراءنے توانائی کے شعبے میں نئے مشترکہ منصوبے شروع کرنے میں دلچسپی کا اظہار کیا، دورے کا مقصد گوادر کو بجلی کی فراہمی کے معاہدے کو حتمی شکل دینا تھا۔وزارت توانائی کا کہنا ہے کہ 9ماہ کے ریکارڈ وقت میں ایران سے گوادر تک بجلی کی ترسیلی لائن بچھائی گئی، پاور سپلائی کے معاہدے کو حتمی شکل دینے کےلئے تکنیکی ٹیموں کے تین سیشن ہوئے، منصوبے کا جلد از جلد افتتاح کر دیا جائےگا۔
پاک ایران معاہدہ