رمضان میں مفت آٹا پیکج پنجاب سے شروع کریں گے: مریم اورنگزیب

 اسلام آباد (ڈیلی پاکستان آن لائن) وفاقی وزیر اطلاعات مریم اورنگزیب نے کہا ہے کہ وزیراعظم شہباز شریف کی ہدایت پر رمضان میں مفت آٹا پیکج پنجاب سے شروع کریں گے۔

نجی ٹی وی ڈان نیوز کے مطابق ن لیگی رہنما مریم اورنگزیب کا کہنا ہے کہ زمان پارک والے کو پاکستان کی سیاست مسترد کر چکی، توشہ خانہ سے گھڑی چرائی یا نہیں جواب تو دو، خیرات کے پیسے سیاست میں لگائے، جواب تو دو۔توشہ خانہ سے چیزیں نکلوانا اور چوری کرنا دو مختلف چیزیں ہیں۔ توشہ خانہ سے تحفہ لے کر بیچنے کے بعد رقم جمع کرائیں تو یہ جرم ہے۔ 

انہوں نے کہا کہ کل لاہور میں ننھی منی ریلی نکالی گئی،عمران خان خود بلٹ پروف گاڑی میں بیٹھے تھے،وہ ریلیوں کیلئے ٹھیک مگر عدالتوں میں آنے کیلئے ٹھیک نہیں۔ فواد چوہدری کل تک الیکشن کمیشن کے خلاف بیان بازی کر رہے تھے، آج تعریف کر رہے ہیں۔ آج کہتے ہیں ہم الیکشن کمیشن کے ساتھ کھڑے ہیں، ان پر ابھی بھی الیکشن کمیشن سے متعلق توہین کا کیس چل رہا ہے۔ مریم اورنگزیب کا مزید کہنا تھا کہ وزیراعظم نے صوبوں کو بھی ہدایت کر دی ہے کہ رمضان میں مفت آٹا فراہم کریں۔