چینی ای کامرس پلیٹ فارمز پر پاکستانی مصنوعات کی بھرپور مقبولیت
جی نان (شِنہوا) چین کے ای کامرس پلیٹ فارمز پر پاکستانی مصنوعات کی بڑھتی ہوئی موجودگی سے اسکی مصنوعات مزید مقبول ہونے کی توقع ہے جس سے دونوں ممالک کے درمیان دو طرفہ تجارت کو فروغ اور ثقافتی روابط بڑھیں گے۔ٹک ٹاک کے چینی ورژن ڈو یِن پر شنگھائی تعاون تنظیم(ایس سی او) کے رکن ممالک کے سامان کی نمائش کے حالیہ لائیو اسٹریمنگ ایونٹ میں میزبان نے پاکستانی پکوان کی بھرپور تعریف کرتے ہوئے کہاکہ باسمتی چاول پاکستانی کسان محنت سے اگاتے ہیں اور یہ اپنے اعلیٰ معیار کیلئے مشہور ہیں، جب انہیں کری جیسے مصالحوں کیساتھ پکایا جاتا ہے تو مسحور کن خوشبو پیدا ہوتی ہے۔پاکستانی مصنوعات کیلئے لائیو اسٹریمنگ ایونٹ ”2025 کے ایس سی او آن لائن مصنوعات“ کے وسیع اقدام کا حصہ تھا جو بیجنگ اور چھنگ ڈاؤ میں ہوا۔ اس میں پاکستان، روس اور بیلاروس سمیت ایس سی او کے 12 ممالک کی 200 سے زائد مصنوعات آن لائن فروخت کیلئے پیش کی گئی تھیں جبکہ سینکڑوں دیگر مصنوعات آف لائن مقامات پر نمائش کیلئے رکھی گئیں۔ایونٹ کا اہتمام چائنہ-ایس سی او زون برائے مقامی اقتصادی و تجارتی تعاون نے چین کے مشرقی شہر چھنگ ڈاؤ میں کیا تھا جسکا مقصد معاشی تعلقات اور ثقافتی تبادلوں کا فروغ ہے، چین میں پاکستانی سفیر خلیل الرحمٰن ہاشمی نے کہا کہ پاکستان کو ایس سی او کا رکن ہونے پر فخر ہے۔سفیرنے چلغوزہ ، ہمالیہ کا گلابی نمک، ہاتھ سے بنے ہوئے قیمتی پتھروں کے ہار اور نمک کی لیمپ جیسی پاکستانی برآمدات کو اجاگر کیا، پاکستانی پکوانوں میں کراچی کے خوشبو دار پلاؤ، پشاور کے نمکین گوشت، لاہور میں ہلکی آنچ پر بنی چٹنی اور ملتان کی مشہور مٹھائیوں کا ذکر کیا۔انھوں نے بتایا کہ میڈیا ریسرچ کے مطابق چین کی لائیو اسٹریمنگ ای کامرس صنعت تیزی سے فروغ پارہی ہے اور 2025 میں اسکا مجموعی تجارتی حجم 21.4 کھرب یوآن (تقریباً 300 ارب امریکی ڈالر) تک پہنچنے کی پیش گوئی کی گئی ہے۔ ای کامرس اب ثقافتی تعلقات کو بھی فروغ دے رہی ہے،یہ لوگوں کو ملتان کی دستکاریوں اور سندھ کے مصالحوں کو عالمی سطح پر متعارف کراتی ہے۔ چین میں پاکستانی تاجر کامل محمد نے ناظرین کیساتھ براہ راست گفتگو میں پتھر کے برتن، لکڑی کے بنے ڈبے اور گلابی نمک جیسی روایتی پاکستانی اشیا سے متعارف کرایا، اسکے علاوہ چاول، خشک میوہ جات، ہاتھ سے بنے قالین،لکڑی کے نقوش اور قیمتی پتھر ڈو یین، تاؤ باؤ اور دیگر چینی ای کامرس پلیٹ فارم پر دستیاب ہیں۔
چینی نمائش
