17سالہ نوشیروان نے نیشنل گیمز میراتھن ریس میں چاندی کا تمغہ جیت لیا

  17سالہ نوشیروان نے نیشنل گیمز میراتھن ریس میں چاندی کا تمغہ جیت لیا

  



لاہور(سپورٹس رپورٹر)پنجاب کے 17سالہ نوجوان کھلاڑی نوشیروان نے 33ویں نیشنل گیمز پشاور میں بدھ کے روز قیوم سٹیڈیم میں میراتھن ریس میں چاندی کا تمغہ جیت لیا ہے، نوشیروان نے 42کلومیٹر کا فاصلہ 2گھنٹے 29منٹ میں طے کیا، آرمی کے ندیم حسن نے 2گھنٹے 24منٹ میں ریس مکمل کرکے میراتھن جیت لی،میراتھن ریس کرنل شیر خان انٹر چینج مردان سے شرو ع ہوئی اور اسی مقام پر ختم ہوئی، ڈی جی سپورٹس خیبر پختونخوا سفندیار خٹک مہمان خصوصی تھے، ہاکی بوائز کے میچ میں پنجاب نے بلوچستان کو 6-1سے شکست دی۔

، رگبی میں آرمی نے پنجاب کو 30-0سے ہرادیا۔پنجاب میڈل ٹیبل پر 15 میڈلز کیساتھ 5ویں پوزیشن پر ہے جس میں چاندی کے 3اور کانسی کے 12میڈلز شامل ہیں، پنجاب کے کھلاڑیوں نے ریسلنگ میں مجموعی طور پر 7میڈلز جیتے ہیں جن میں چاندی کے دو اور کانسی کے پانچ میڈلز جیتے ہیں جبکہ سوئمنگ بوائز میں تین کانسی اور گرلز نے ایک کانسی کے تمغے جیتے ہیں،کشتی رانی میں کانسی کے دو اور ایک کانسی کا میڈل اتھلیٹکس میں جتیا ہے، پاک آرمی ٹاپ پوزیشن پر ہے جس نے اب تک سونے کے 58، چاندی کے 50اور کانسی کے 32تمغے جیتے ہیں، واپڈا دوسرے نمبر پر ہے جس نے سونے کے 36، چاندی کے 31اور کانسی کے 25میڈلز جیتے ہیں، نیوی نے اب تک سونے کے 15، چاندی کے 14اور کانسی کے 10میڈلز جیتے ہیں، سندھ نے اب تک سونے کا ایک، چاندی کے 7اور کانسی کے 9میڈلز جیتے ہیں، خیبر پختونخوا نے ایک سلور اور 9برانز میڈلز جیتے ہیں جبکہ اسلام آباد نے صرف برانز میڈل جیتا ہے۔ڈائریکٹر جنرل سپورٹس پنجاب نے 33ویں نیشنل گیمز پشاور میں پنجاب کے کھلاڑیوں کی کارکردگی پر اطمینان کا اظہار کرتے ہوئے کہا ہے کہ نیشنل گیمز میں ملک بھر سے کھلاڑی شرکت کررہے اور سخت مقابلے ہورہے ہیں، ریسلنگ، ہاکی میں ہمارے کھلاڑیوں نے اچھی کارکردگی کا مظاہرہ کیا ہے،اب تک پنجاب کے کھلاڑی ایک درجن سے زائد میڈلز جیت چکے ہیں، امید کرتے ہیں کہ کھلاڑی دیگر کھیلوں میں بھی بہترین کارکردگی کا مظاہرہ کرتے ہوئے مزید میڈلز جیتیں گے۔

مزید : کھیل اور کھلاڑی