وفاقی حکومت کا ملک بھر میں بند مندر کھولنے کا فیصلہ

  وفاقی حکومت کا ملک بھر میں بند مندر کھولنے کا فیصلہ

  



اسلام آباد (سٹاف رپورٹر)پاکستان تحریک انصاف کی حکومت نے ہندو آبادی کے دیرینہ مطالبے پر ملک بھر میں بند ہندو مندر کھولنے کا فیصلہ کر لیا۔مرکزی سیکرٹری اطلاعات احمد جواد نے اہم حکومتی اقدامات کا خلاصہ جاری کر دیا جس میں یہ بتایا گیا ہے کہ ہندو آبادی کے دیرینہ مطالبے پر ان کی عبادت گاہوں کو از سر نو کھولا جائے گا۔احمد جواد کی جانب سے جاری کیے گئے اعلامیہ میں پی ٹی آئی کے اب تک کے 10 بہترین اقدامات کے بارے میں بتایا گیا ہے، جس میں قومی ایئرلائین (پی آئی اے) کا ماہانہ خسارہ 3 ارب سے کم ہوکر ڈیڑھ ارب رہ جانا بھی شامل ہے۔اس کے علاوہ آلٹرنیٹ انرجی ڈویلپمنٹ بورڈ (اے ای ڈی بی) کی جانب سے 550 میگاواٹ صلاحیت کے حامل ہوا سے بجلی پیدا کرنے والے 11 منصوبوں کی تعمیر کیلئے معاہدوں کا بھی اعلامیے میں ذکر ہے۔احمد جواد کے مطابق مصنوعی مہنگائی پر قابو پانے اور قیمتوں کو قابو میں رکھنے کیلئے وفاقی حکومت کا اشیائے ضروریہ کی طلب و رسد کے حوالے سے مربوط حکمت عملی وضع کرنے کیلئے سپیشل سیل کی تشکیل کا فیصلہ کیا گیا ہے۔مرکزی سیکرٹری اطلاعات تحریک انصاف کی جانب سے جاری اعلامیہ میں بتایا گیا کہ ٹیکسٹائل کی برآمدات میں 20فیصد اضافہ ریکارڈ کیا گیا ہے اور یہ بھی کہ اکتوبر میں ترسیلات زر 2 ارب ڈالرز ریکارڈ کی گئیں جو کہ ستمبر 2019 کے مقابلے میں 14.4فیصد زیادہ ہے۔احمد جواد کے مطابق گوادر میں جدید ترین سہولیات سے آراستہ ہسپتال کی 24 ماہ میں تعمیر مکمل کرنے کے منصوبے پر چینی کمپنی نے کام کا باقاعدہ آغاز کردیا۔ منصوبے پر 100 ملین ڈالرز کی لاگت آئے گی۔حکومت کے دس بہترین اقدامات میں نئے کاروباروں کے آغاز، کاٹیج انڈسٹری اور چھوٹے اور درمیانے درجے کی صنعتوں کی افزائش میں معاونت کیلئے پنجاب حکومت کا قرضے کی اسکیم شروع کرنے کا فیصلہ بھی شامل ہے۔پنجاب حکومت کا قصور میں عالمی معیار سے ہم آہنگ، سرمایہ کاری کیلئے یکساں پرکشش اور وباؤں سے آزاد لائیو سٹاک زون قائم کرنے کا فیصلہ بھی اعلامیہ کا حصہ ہے۔دریاؤں کے بہاؤ کی نگرانی اور سیلاب کی پیشگوئی کیلئے خیبر پختونخوا حکومت نے صوبے کے 5 دریاؤں پر ڈیجیٹل ٹیلی میٹری سسٹم نصب کردیا ہے جو کہ ایک اہم کامیابی ہے۔

پی ٹی آئی حکومت

مزید : صفحہ اول