ٹیکس نظام میں بہتری کیلئے جدید ترین ٹیکنالوجی کا استعمال ناگزیر، نگران وزیراعظم
اسلام آباد (این این آئی)نگران وزیر اعظم انوار الحق کاکڑ نے کہاہے ٹیکس نظام میں بہتری کیلئے جدید ترین ٹیکنالوجی کا استعمال نا گزیر ہے،سمگلنگ کے کنٹرول کیلئے پچھلے دنوں کا فی اہم اقدامات اٹھائے گئے ہیں لیکن اس حوالے سے مزید تندہی سے کام کرنا ہو گا،ایف بی آر کی کارکردگی بہتر بنانے کے حوالے سے تمام اسٹیک ہولڈرز سے مشاورت کی جائے اور اس حوالے سے ایک جامع لائحہ عمل پیش کی جائے جس میں تمام متعلقہ اداروں کی تجاویز بھی شامل کی جائیں۔ پیر کو وزیر اعظم آفس سے جاری اعلامیہ کے مطابق نگران وزیر اعظم انوار الحق کاکڑ کی زیر صدارت فیڈرل بورڈ آف ریونیو سے متعلق اجلاس اسلام آباد میں منعقد ہوا۔وزیر اعظم کوٹیکس نیٹ وسیع اور ٹیکس سسٹم کو ڈیجیٹائز کرنے کے حوالے سے بریفینگ دی گئی۔ اجلاس میں ایف بی آر کی ری اسٹرکچر نگ کے حوالے سے مختلف تجاویز زیر غور آئیں۔اجلاس کے شرکاء سے بات کرتے ہوئے وزیر اعظم نے کہا محصولات کی وصولی ملک کی معیشت میں ریڑھ کی ہڈی کی حیثیت رکھتی ہے۔ ٹیکس نظام میں بہتری کیلئے جدید ترین ٹیکنالوجی کا استعمال نا گزیر ہے۔سمگلنگ کے کنٹرول کیلئے پچھلے دنوں کافی اہم اقدامات اٹھائے گئے ہیں لیکن اس حوالے سے مزید تندہی سے کام کرنا ہو گا۔وزیر اعظم نے ہدایت دی کہ ایف بی آر کی کارکردگی بہتر بنانے کے حوالے سے تمام اسٹیک ہولڈرز سے مشاورت کی جائے اور اس حوالے سے ایک جامع لائحہ عمل پیش کی جائے جس میں تمام متعلقہ اداروں کی تجاویز بھی شامل کی جائیں۔ اجلاس میں نگران وفاقی وزیر خزانہ ڈاکٹر شمشاد اختر، مشیر وزیر اعظم احد چیمہ، چیئرمین ایف بی آر، وفاقی سیکرٹری خزانہ اور دیگر متعلقہ افسران نے شرکت کی۔
نگران وزیراعظم
