سکھر انتظامیہ کی عدم توجہ،شہر میں جاری ترقیاتی کام مکمل نہ ہوسکے
سکھر(ڈسٹرکٹ رپورٹر)سکھر انتظامیہ کی عدم توجہ،شہر میں جاری ترقیاتی کام مکمل نہ ہوسکے،شہر میں تعمیر شدہ سڑکیں کھودنے اور ملبہ سڑکوں پر جمع کرنے کا عمل جاری،ناقص میٹریل کا استعمال ،ملبہ سڑکوں پر جمع ہونے کی وجہ سے علاقہ مکین سمیت شہری پریشان حال،چیف جسٹس آف پاکستان و دیگر بالا حکام سے نوٹس لینے کا مطالبہ۔تفصیلات کے مطابق سندھ کے تیسرے بڑے شہر سکھر میں انتظامیہ اور محکمہ پبلک ہیلتھ ڈپارٹمنٹ و منتخب عوامی نمائندگان کی عدم توجہی مسلسل لاپرواہی کے باعث شہر کے مختلف علاقوں میں خطیر رقم سے تعمیر ہونی والی سڑکوں کو ترقیاتی کام کی مد میں کھدائی کرکے سرکاری خزانے کو ٹھکانے لگانے کا عمل جاری ہے، شہر کے مختلف رہائشی و تجارتی علاقوں سمیت شہر کی اہم و مصروف ترین سڑکوں پر خطیر رقم سے تعمیر شدہ سڑکوں کو ترقیاتی کاموں کا نام دیکر مزید تباہ کرنے کے بعدسڑک کھود کر ملبہ سڑکوں پر ڈالا جارہا ہے جس کے باعث علاقے کے مکینوں سمیت مسافر گاڑیوں کو آمد و رفت میں شدید مشکلات کا سامنا کرنا پڑتا ہے لیکن انتظامیہ مذکورہ سڑک پر پڑے ملبے کی وجہ درپیش مشکلات دیکھنے کو کوئی تیار نہیں ہے شہری و سماجی حلقوں نے سکھر انتظامیہ سمیت ترقیاتی کاموں پر سیاست چمکانے والے سابق بلدیاتی منتخب نمائندگان کو سخت تنقید کا نشانہ بناتے ہوئے چیف جسٹس آف پاکستان،وزیر اعلی سندھ، صوبائی وزیر بلدیات سیکریٹری لوکل گورنمنٹ و دیگر بالا حکام سے ترقیاتی کاموں کے باعث شہر کو تباہ کرنے والے عمل کا نوٹس لیکر شہریوں کو درپیش مشکلات سے نجات دلانے سمیت سرکاری خزانے کو مال غنیمت سمجھ کر لوٹنے والوں کے خلاف کاروائی کا پرزور مطالبہ کیا ہے۔
