سموگ سے نمٹنےکیلیے سخت فیصلے کیے جانے کا امکان ، کل اہم اجلاس طلب
لاہور ( ڈیلی پاکستان آن لائن ) پنجاب میں سموگ سے تدارک کے لیے سخت فیصلے کیے جانے کا امکان ہے اور اس حوالے سے کل اہم اجلاس طلب کر لیا گیا ہے ۔"جیو نیوز " کے مطابق نگراں وزیر اعلیٰ پنجاب محسن نقوی نے اسموگ کی صورت حال پر کل اجلاس طلب کر لیا ہے۔ذرائع کا کہنا ہے کہ اجلاس میں مارکیٹوں کو ہفتے میں 2 دن بند کرنے کی تجویز پر بھی غور ہوگا جبکہ سیکرٹری ٹرانسپورٹ گاڑیوں کی آمدو رفت محدود کرنے کے حوالے سے اقدامات سے آگاہ کریں گے۔
نگراں وزیراعلیٰ محسن نقوی نے ڈپٹی کمشنرز کو ہدایت جاری کرتے ہوئے کہا کہ فصلوں کی باقیات جلانے پر پابندی کے فیصلے پر سختی سے عمل کروائیں اور ٹائر جلانے والی فیکٹریوں کے خلاف بھی سخت کارروائی کی جائے۔انہوں نے سیکریٹری سکول ایجوکیشن کو ہدایت کرتے ہوئے کہا کہ پرائمری سکولز میں ماسک کے استعمال کو یقینی بنایا جائے۔
نگران وزیر ٹرانسپورٹ پنجاب ابراہیم حسن مراد نے کہا کہ سموگ سے نمٹنے کیلئے بدھ کے روز ورک فرام ہوم، آن لائن سکولنگ اور پبلک ٹرانسپورٹ محدود کرنے پر غور کیا جا رہا ہے۔فضائی آلودگی میں اضافے کا سبب بننے والی گاڑیوں کے مالکان پر جرمانہ ہوگا جب کہ انڈسٹری، بھٹہ مالکان اور زرعی زمینوں پر فصلوں کی باقیات جلانے والوں کے خلاف بھی سخت کریک ڈاؤن کریں گے، گزشتہ ہفتے جو اقدامات کیے ان کے بہتر نتائج برآمد ہوئے اور اسی لیے سموگ کو کم کرنے کیلئے مزید کوششیں کی جارہی ہیں۔
