شاہین اور حارث کو ون ڈے کے لیے نہیں بلکہ ٹی ٹوئنٹی کے لیے تیار کیا تھا ، عاقب جاوید کا تہلکہ خیز بیان
لاہور(ڈیلی پاکستان آن لائن)پاکستان سپر لیگ میں فرنچائز لاہور قلندرز کے ڈائریکٹر عاقب جاوید نے فاسٹ باؤلر شاہین شاہ آفریدی اور حارث رؤف کو ٹی ٹوئنٹی کا باؤلر قرار دیا ہے۔آئی سی سی ون ڈے ورلڈکپ میں پاکستان کرکٹ ٹیم کے باؤلرز کی ناقص کارکردگی کے بعد ان پر کڑی تنقید کی جارہی ہے، اب عاقب جاوید کی جانب سے اس معاملے پر وضاحت پیش کی گئی۔
نجی ٹی وی کے ایک پروگرام میں گفتگو کرتے ہوئے عاقب جاوید نے کہا 'ہم نے شاہین اور حارث کو ٹی ٹوئنٹی کرکٹ کے لیے ٹرین کیا، مجھے پچھلے ہفتے سے گالیاں دی جارہی ہیں'۔سابق پاکستانی کرکٹر کا کہنا ہے کہ 'حارث اور شاہین کی خراب بولنگ پر مجھے برا بھلا کہا جارہا ہے کہ حارث ٹھیک باؤ لنگ نہیں کروا رہا، شاہین مڈل اوورز صحیح نہیں کروا رہا، ہم نے انہیں خالص ٹی ٹوئنٹی کے لیے ٹرین کیا تھا ون ڈے کرکٹ کے لیے نہیں'۔ان کا یہ بھی کہنا تھا کہ 'ہم نے پاکستان کو انہیں بطور ٹی ٹوئنٹی باؤلرز دیا تھا لیکن مینجمنٹ انہیں ون ڈے کھلارہی ہے'۔
