انتخابی ضابطہ اخلاق کی خلاف ورزی فواد چودھری ، شیخ رشید اور غلام سرور کو شوکاز نوٹس جاری
اسلام آباد(سٹاف رپورٹر) الیکشن کمیشن نے انتخابی ضابطہ اخلاق کی خلاف ورزی پر وفاقی وزراء فواد چودھری، شیخ رشید اور غلام سرور کو شوکاز نوٹس جاری کردیئے۔الیکشن کمیشن کے مطابق وزیرریلوے شیخ رشید حلقے کے امیدوار کی انتخابی مہم میں حصہ لیتے رہے جبکہ وفاقی وزیراطلاعات فواد چودھری اوروفاقی وزیر پٹرولیم غلام سرورخان بھی ضابطہ اخلاق کی خلاف ورزی میں ملوث پائے گئے۔الیکشن کمیشن نے تینوں وزرا ء کوشوکاز نوٹس جاری کردیے۔ وفاقی وزراء کی جانب سے 48گھنٹوں کے اندر جواب جمع نہ کرانے پر مزید کارروائی کی جائے گی۔ پی پی 27 سے پی ٹی آئی امیدوار شاہ نواز راجہ کو بھی شوکاز نوٹس جاری ہوگیا۔ضابطہ اخلاق پرعمل درآمد کے لیے الیکشن کمیشن نے ڈسٹرکٹ مانیٹرننگ افسرتعینات کردیئے ہیں۔ جوکسی بھی خلاف ورزی کی صورت میں کارروائی کے مجاز ہیں۔انتخابی ضابطہ اخلاق صدر، وزیراعظم، سینیٹ، قومی وصوبائی اسمبلیوں، گورنرز اور بلدیاتی نمائندوں پر بھی لاگو ہوگا۔
