عمران خان عوام کا اعتماد کھو چکے ،حکومت ہمارا راستہ نہیں روک سکتی،چیف الیکشن کمشنر سوالوں کا جواب نہیں دے سکتے تو استعفی دے دیں : شاہد خاقان عباسی
لاہور (ڈیلی پاکستان آن لائن) سابق وزیراعظم مسلم لیگ ن کے رہنما شاہد خاقان عباسی نے کہا ہے کہ عمران خان عوام کا اعتماد کھو چکے ہیں جبکہ جیت ن لیگ سے عوام کی محبت کا نتیجہ ہے ، 41 سے زائد پولنگ سٹیشنز کا دورہ کیا وہاں کا انچارج اور پولنگ پر مامور عملہ نہیں تھا، الیکشن کمیشن اپنے کام میں ناکام ہو چکا، چیف الیکشن کمشنر سوالوں کا جواب نہیں دے سکتے تو استعفی دے دیں ۔
تفصیلات کے مطابق این اے 124 میں کامیابی حاصل کرنے کے فوری بعد شاہد خاقان عباسی کا کارکنوں سے خطاب کرتے ہوئے کہناتھا کہ یہاں سے الیکشن لڑنے کی ذمہ داری نواز شریف نے دی تھی، مجھے اس حلقے سے اپنی جیت پر کبھی کوئی شک نہیں تھا، میں مجتبیٰ شجاع الرحمٰن سمیت تمام لیگی کارکنان کا شکر گزار ہوں، آنے والے پانچ سالوں میں آپ کے درمیان رہوں گا اور کوشش کروں گا کہ اسمبلی میں آپ کی مؤثر نمائندگی کر سکوں۔انہوں نے کہا کہ الیکشن کمیشن کی جانب سے ہماری زبان بند کروا دی گئی جبکہ حکمران جماعت کے لوگ سارا دن میڈیا کو بیانات دیتے رہے پر ہم کسی سے ڈرنے والے نہیں ہیں ،حکومت ہمارا راستہ نہیں روک سکتی ، ٹرن آؤٹ کم رہاپھربھی زیادہ ووٹ لیے، وزیراعظم عمران خان عوام کا اعتماد کھوچکے ہیں، عوام نے عمران خان کومسترد کردیا ہے کیونکہ وہ چور دروازے سے حکومت میں آئے ہیں،حلقہ این اے 124 کے ووٹروں نے ثابت کیا ہے کہ وہ کل بھی نواز شریف کے ساتھ تھے اور آج بھی نواز شریف کے ساتھ ہیں۔سابق وزیر اعظم شاہد خاقان عباسی کا کہنا تھا کہ مسلم لیگ(ن)کے کارکنوں نے بہت محبت دی ہے،آج ہماری تاریخی فتح ہوئی ہے ،تحریک انصاف سے دگنے ووٹ حاصل کئے ہیں اور یہ جیت ن لیگ سے عوام کی محبت کا نتیجہ ہے۔انہوں نے چیف الیکشن کمشنر سے سوال کیا کہ وہ بتائیں کہ پولنگ سٹیشن کا انچارج کون ہوتا ہے؟میں نے 41 سے زائد پولنگ سٹیشنز کا دورہ کیا وہاں کا انچارج اور پولنگ پر مامور عملہ نہیں تھا، الیکشن کمیشن اپنے کام میں ناکام ہو چکا ہے، اسی غیر قانونی کام کو دھاندلی کہا جاتا ہے، یہ غیر قانونی معاملات عوامی رائے کی نفی کرتے ہیں،چیف الیکشن کمشنر اگر میرے سوالوں کا جواب نہیں دے سکتے تو استعفی دے دیں۔شاہد خاقان عباسی نے کہا کہ شہباز شریف کی گرفتاری کا مقصد یہ تھا کہ جو بھی حکومت کے خلاف جائے گا اسے گرفتار کر لیا جائے گا،جو گرفتار کرنا چاہتا ہے کر لے، ہم گرفتاریوں سے نہیں ڈرتے،ہم نے ہمیشہ تحمل سے سیاست کی ہے اگر ضرورت پڑی تو عمران خان کے ساتھ دوسرے طریقے سے بھی لڑیں گے، پاکستان کے مسائل عمران خان حل نہیں کر سکتا ہے، اگر پاکستان کے مسائل حل کرنے ہیں تو نواز شریف کو واپس لانا ہو گا۔
واضح رہے کہ لاہورکے حلقہ این اے 124سے غیر حتمی و غیر سرکاری نتائج کے مطابق مسلم لیگ ن کے امیدوار شاہد خاقان عباسی نے75012ووٹ لے کر بھاری اکثریت سے کامیابی حاصل کی ہے،این اے124 میں کل ووٹرز کی تعداد5 لاکھ 35 ہزار 172 اور 415 پولنگ سٹیشنز میں سے 324 پولنگ سٹیشنز کو حساس جبکہ 91 پولنگ سٹیشننز کو حساس ترین قرار دیا گیا تھا ۔
