حکومت مختلف ممالک سے ملنے والے تحائف نہ بتا کر کیوں شرمند ہ ہو رہی ہے؟ اسلام آباد ہائیکورٹ

  حکومت مختلف ممالک سے ملنے والے تحائف نہ بتا کر کیوں شرمند ہ ہو رہی ہے؟ ...

  

          اسلام آباد(آئی این پی)وفاقی حکومت نے ایک بار پھر وزیر اعظم عمران خان کو ملنے والے تحائف کے حوالے سے بتانے یا نہ بتانے کیلئے عدالت سے مہلت مانگ لی،جس پر عدالت نے وفاقی حکومت کی استدعا پر سماعت ملتوی کردی۔اسلام آ باد ہائیکورٹ نے کہا  ہے کہ حکومت دیگر ممالک سے ملنے والے تحائف نہ بتا کر کیوں شرمندہ ہورہی ہے؟ حکمرانوں کو ملنے والے تحائف ان کے نہیں بلکہ عوام کے ہیں۔  تفصیلات  کے مطابق اسلام آباد ہائی کورٹ میں توشہ خانہ ریفرنس کی سماعت ہوئی۔ عدالت کا کہنا تھا کہ اگر کوئی دفاعی تحفہ ہو بے شک نہ بتائیں لیکن ہر تحفے کو پبلک کرنے پر پابندی کیوں ہے۔ جسٹس میاں گل حسن اورنگزیب نے استفسار کرتے ہوئے ریمارکس دیئے کہ  اگر کسی ملک نے ہار تحفے میں دیا تو پبلک کرنے میں کیا حرج ہے؟، حکومت دیگر ممالک سے ملنے والے تحائف نہ بتا کر کیوں شرمندہ ہورہی ہے؟، حکمرانوں کو ملنے والے تحائف ان کے نہیں بلکہ عوام کے ہیں، اگر کوئی عوامی عہدہ نہ ہو تو کیا عہدوں پر بیٹھے لوگوں کو تحائف ملیں گے؟۔عدالت نے کہا کہ حکومت کیوں تمام تحائف کو میوزیم میں نہیں رکھتی؟ بیرون ممالک میں تو یہ ہوتا ہے، حکومت کو تو چاہیے گزشتہ دس برسوں کے تحائف پبلک کردے، حکومت یہ بھی بتائے کہ کتنے تحائف کا ایف بی آر سے تخمینہ لگوایا؟۔ 

اسلام آباد ہائیکورٹ

مزید :

صفحہ اول -