کوئی صوبہ یا فرد واحدآپریشن  نہیں روک سکتا،سہیل آفریدی ناکام ہونگے،رانا ثنااللہ 

 اسلام آباد (این این آئی)مشیر وزیراعظم راناثنااللہ نے کہا ہے کہ اگر کوئی آپریشن ہورہا ہو تو کوئی صوبہ یا شخص آپریشن نہیں روک سکتا، بانی پی ٹی آئی اپنا بھاشن دیتے رہیں اس سے فرق نہیں پڑے گا۔نجی ٹی وی پروگرام میں گفتگو کرتے ہوئے راناثنااللہ نے کہا کہ دہشتگردوں کوبھارت کی مکمل تائید اور سپورٹ حاصل ہے، جب تک دہشتگردوں کا قلع قمع نہ ہوایہ جنگ جاری رہے گی۔ انہوں نے کہا کہ کوئی صوبہ یا وزیراعلیٰ کسی ملک سے براہ راست بات نہیں کرسکتا، ان کو افغانستان سے بات چیت کی اجازت نہیں دی جائے گی، سہیل آفریدی سے خیبرپختونخوا کی صورتحال نہیں سنبھالی جائیگی، علی امین گنڈاپور کو اس لئے ہٹایاگیا کیونکہ وہ پارٹی کی توقعات پوری نہیں کرسکے۔ انہوں نے کہا کہ پی ٹی آئی والے سیاست نہیں کررہے،ہیجان پیدا کر رہے ہیں، پی ٹی آئی کی سیاست تشدد اور غیرجمہوری رویوں پر مشتمل ہے، ملک میں آئینی اورجمہوری حکومت موجود ہے، پی ٹی آئی والے حکومت کیساتھ بیٹھ کر مسائل حل کرسکتے ہیں۔انہوں نے کہا کہ آزاد کشمیر میں صحت، تعمیر وترقی،سمیت دیگرعوامی نوعیت کے مطالبات تھے، وزیراعظم نے عوامی مفادات سے متعلق مطالبات کی فہرست منگوا لی ہے، مہاجرین کی سیٹوں کامعاملہ آئینی ہے۔

رانا ثنااللہ