بستیوں میں اِک صدائے بے صدا رہ جائے گی | امجد اسلام امجد|
بستیوں میں اِک صدائے بے صدا رہ جائے گی
بام و دَر پہ نقش تحریرِ ہوا رہ جائے گی
آنسوؤں کا رِزق ہوں گی بے نتیجہ چاہتیں
خشک ہونٹوں پر لرزتی اِک دُعا رہ جائے گی
رُو برو منظر نہ ہوں تو آئینے کس کام کے
ہم نہیں ہوں گے تو دُنیا گردِ پا رہ جائے گی
خواب کے نشّے میں جھکتی جائے گی چشمِ قمر
رات کی آنکھوں میں پھیلی اِلتجا رہ جائے گی
بے ثمر پیڑوں کو چومیں گے صبا کے سبز لب
دیکھ لینا، یہ خزاں بے دست و پا رہ جائے گی
شاعر: امجد اسلام امجد
(شعری مجموعہ:پسِ گفتگو )
Bastion Men Ik Sada -e- Be Sada Reh Jaaey Gi
Baam -o- Dar Pe Naqsh Tehreer -e- Hawaa Reh Jaaey Gi
Aansuon Ka Rizq Hon Gi Be Nateeja Chaahten
Khushk Honton Par Larazti Ik Dua Reh Jaaey Gi
Rubaru Manzar Na Hon To Aainay Kiss Kaam K
Ham Nahen Hon Gay To Dunya Gard -e-Pa Reh Jaaey Gi
Khaab K Nashhay Men Jhukti Jaey Gi Chashm -e- Qamar
Raat Ki Aankhon Men Phaili Iljata Reh Jaaey Gi
Be Samar Pairron Ko Chomen Gay Sabaa K Sabz Lab
Dekh Lena , Yeh Khizaan Be Dast -o- Paa Reh Jaaey Gi
Poet: Amjad Islam Amjad