9مئی مقدمات کے ملزموں کی ضمانت منسوخی کی اپیلوں پر 4ماہ میں ٹرائل مکمل کرنیکی ہدایت
اسلام آباد(آئی این پی) سپریم کورٹ نے نو مئی کے مقدمات میں پنجاب حکومت کی جانب سے ملزمان کی ضمانت منسوخی کی اپیلوں پر چار ماہ میں ٹرائل مکمل کرنے کی ہدایت کرتے ہوئے نمٹا دیں۔ سپریم کورٹ میں نو مئی کے ملزمان کی ضمانت منسوخی کی اپیلوں پر سماعت ہوئی۔ وکیل سمیر کھوسہ نے کہا خدیجہ شاہ کے ایک کیس میں عدالت نے ایسا ہی حکم دیا، خد یجہ شاہ پر مزید تین مقدمات بھی درج ہیں۔چیف جسٹس نے ریمارکس دئیے خدیجہ شاہ سمیت تمام ملزموں کے قانونی حقوق کی فراہمی یقینی بنائینگے، عدالتی حکم میں اس حوالے سے وضاحت بھی کرینگے۔وکیل خدیجہ شاہ نے کہا کئی گواہان کے بیان ریکارڈ ہوچکے ابھی تک فرد جرم کی کاپی نہیں ملی، ٹرائل کورٹس کی آزادی کو بھی یقینی بنایا جائے، وکیل سمیر کھوسہ نے کہا اے ٹی سی سرگودھا کے جج نے اس حوالے سے ہائیکورٹ کو خط بھی لکھا تھا۔چیف جسٹس نے کہا اے ٹی سی کی آزادی والا مسئلہ حل ہوچکا وہ فیصلہ پڑھ لیں، ملزموں کو فرد جرم سمیت تمام دستاویزات کی فراہمی یقینی بنائی جائیگی۔ 9مئی مقدمات کی سماعت کے دوران فواد چوہدری عدالت میں پیش ہوئے اور موقف اختیار کیا میرے مقدمات آپ کی ہدایت کے باوجود مقرر نہیں ہو رہے۔ فواد چوہدری نے چیف جسٹس پاکستان سے شکایت کی 4ماہ میں ٹرائل مکمل کرنے کا خط ملتے ہی انسداد دہشتگردی عدالتیں فوجی عدالتوں میں تبدیل ہو گئی ہیں۔ چیف جسٹس یحییٰ آفریدی نے ریمارکس دئیے عدالتی حکم جاری ہی نہیں ہوا تو خط کیسے پہنچ سکتا ہے؟ اگر کوئی خط جاری کیا گیا ہے تو اسے واپس لیا جائیگا۔چیف جسٹس یحییٰ آفریدی نے ریمارکس دئیے آپ کا کیس کل لگ جائیگا، جس پر فواد چوہدری نے کہا میرا کیس مقرر نہیں ہو رہا لیکن ان کیسز کے احکامات سے براہ راست متاثر ہو رہا ہوں، سپریم کورٹ سے انسداد دہشتگردی عدالتوں کو خط بھیجا گیا ہے، سپریم کورٹ کا خط ملتے ہی انسداد دہشتگردی عدالتیں فوجی عدالتوں میں بدل گئی ہیں۔چیف جسٹس نے استفسار کیا عدالتی حکم جاری ہی نہیں ہوا تو خط کیسے پہنچ سکتا ہے؟ اگر کوئی خط جاری کیا گیا ہے تو اسے واپس لیا جائیگا، پراسیکیوٹر ذوالفقار نقوی نے موقف اختیار کیا ایسا کوئی خط میرے علم میں نہیں۔فواد چوہدری نے کہا انسداد دہشتگردی عدالت سرگودھا کے جج نے خط ملنے کی بات کی ہے، عدالت نے نو مئی کے مقدمات جمعرات کو بھی مقرر کرنے کی ہدایت کر دی۔
سپریم کورٹ ہدایت
