اپوزیشن کی بات ڈیڈلاک خاتمہ کیلئے مانی ،اب قانون سازی میں ساتھ دے

حکمران جماعت پاکستان تحریک انصاف کے مرکزی رہنما شبلی فراز نے کہا ہے پی ٹی آئی نے بہتر ورکنگ ریلشن شپ اور اسمبلی میں قانون سازی کے عمل کو آگے بڑھانے کیلئے ہی شہباز شریف کو پی اے سی کا چیئرمین بنانے کا فیصلہ کیا ہے ۔ایشو آف دی ڈے میں بات کرتے ہو ئے ان کا کہنا تھا اب اپوزیشن کا فرض بنتا ہے وہ حکومت پر بے جا تنقید کی بجائے ملکر قانون سازی کے عمل کو آگے بڑھائے اور مفاد عامہ سے متعلق امور کی انجام دہی کیلئے حکومت کا بھرپو ر ساتھ دے ۔ اب بھی پی ٹی آئی کا بنیادی طور پر وہی موقف ہے ایک سگے بڑے بھائی کا سگا چھوٹا بھائی کیسے آزادانہ احتساب کر سکتا ہے لیکن اب ایک سب کمیٹی اس کو دیکھے گی جو اچھی بات ہے ہم چاہتے ہیں شفافیت ہو اسی لئے ہم کسی اور کو بنانا چاہتے تھے لیکن اپوزیشن کی بات کو مان لیا تاکہ ڈیڈ لاک کا خاتمہ ہو سکے۔