کراچی ٹیسٹ میں محمد رضوان کو آرام کرایا جائے، حفیظ
لاہور(سپورٹس رپورٹر):پاکستان کرکٹ ٹیم کے سابق کپتان محمد حفیظ نے کہا ہے کہ تیسرے ٹیسٹ میچ میں محمد رضوان کو آرام دے کر سرفراز احمد کو موقع دینا چاہیے۔ مقامی ٹی وی پروگرام میں گفتگو کرتے ہوئے انہوں نے ٹیسٹ سیریز میں انگلینڈ کی تکنیک کی تعریف کرتے ہوئے کہا کہ وہ شاندار حکمت عملی کے ساتھ میدان میں اترے اور کامیاب بھی رہے۔ انہوں نے کہا کہ گزشتہ تین ساڑھے تین سالوں سے محمد رضوان پاکستان کرکٹ ٹیم میں شامل ہیں۔
وہ اچھی کارکردگی کا مظاہرہ کررہے ہیں لیکن ہم یہ ہی غلطی کر رہے ہیں، انہیں مسلسل کھلا رہے ہیں ہمیں چاہیے مسلسل کھیلنے والے کھلاڑیوں کو آرام دیں اور دوسرے آپشنز پر غور کریں۔انہوں نے کہا کہ ماضی میں یہی غلطی کی گئی اور کامران اکمل کوتینوں فارمیٹ میں بغیر آرام کے کھلایا گیا جس نے انہیں نقصان پہنچایا۔حفیظ کا کہنا تھا کہ سرفراز گزشتہ تین سال سے ٹیم کے ساتھ ہیں لیکن انہیں کھلایا نہیں جاتا، انہیں کئی جگہوں پر کھلایا جاسکتا ہے، پی سی بی یا بابر کو سوچنا چاہیے اگر رضوان کی ٹیسٹ کرکٹ میں کارکردگی اچھی نہیں ہو رہی تو انہیں آرام دے کر سرفراز کو موقع دیں۔محمد حفیظ نے مزید کہا کہ پاکستان کو سعود شکیل اور ابرار احمد کے طور پر شاندار کھلاڑی ملے، ورلڈ کپ سے قبل جب انگلینڈ نے وائٹ بال سیریز کے لیے پاکستان کا دورہ کیا تھا جب ابرار کو کھلانا چاہیے تھا تاکہ اسے ٹی ٹوئنٹی فارمیٹ پر اپنا کھیل پیش کرنے کا موقع ملتا۔
