ری پولنگ میں کامیابی پارٹی کارکنان کی محنت اور باہمی اتحاد کا ثمر: محمودخان 

  ری پولنگ میں کامیابی پارٹی کارکنان کی محنت اور باہمی اتحاد کا ثمر: ...

  

      پشاور(سٹاف رپورٹر)وزیراعلیٰ خیبرپختونخوا محمود خان نے ضمنی بلدیاتی انتخابات میں تحریک انصاف کے کامیاب اْمیدواروں کو مبارک باد پیش کرتے ہوئے کہا ہے کہ ری پولنگ میں پاکستان تحریک انصاف نے ڈیرہ، کرک اور بنوں سمیت دیگر اضلاع میں شاندار کامیابیاں حاصل کی ہیں جو پارٹی کارکنان کی محنت اور باہمی اتحاد کا ثمر ہیں۔پیر کے روز اس سلسلے میں یہاں سے جاری اپنے ایک بیان میں وزیراعلیٰ نے ری پولنگ میں پی ٹی آئی کی شاندار انداز میں واپسی پر کارکنان کو بھی مبارک باد پیش کی ہے اور ری پولنگ کے پر امن انعقاد پر متعلقہ انتظامیہ اور قانون نافذ کرنے والے اداروں کو خراج تحسین پیش کیا ہے۔ محمود خان نے اْمید ظاہر کی کہ انشاء اللہ پی ٹی آئی بلدیاتی انتخابات کے دوسرے مرحلے میں بھی شاندار کامیابی حاصل کرے گی۔ اْنہوں نے اس موقع پر کارکنان پرزور دیا کہ وہ بھر پور انداز میں دوسرے مرحلے کے انتخابات کی تیاریاں جاری رکھیں اور اپنی صفوں میں اتحاد برقرار رکھیں۔محمود خان نے کہاکہ جو لوگ اپنے گھر میں بلدیاتی انتخابات نہیں جیت سکتے وہ حکومت گرانے کی باتیں کر رہے ہیں،ری پولنگ کے نتائج سے پتہ چل گیا ہے کہ عوام پی ٹی آئی کے ساتھ ہیں اور موجودہ حکومت کی پالیسیوں اور اقدامات سے مطمئن ہیں۔ وزیراعلیٰ نے کہاکہ عمران خان کی قیادت میں ملک درست سمت میں چل رہا ہے،اپوزیشن عمران خان کی بڑھتی ہوئی عوامی مقبولیت سے خائف ہے۔ محمود خان نے کہاکہ عوام نے مفاد پرست ٹولے کو یکسرمسترد کردیا ہے اور اب پی ٹی آئی ہی عوام کی اْمیدوں کا واحد مرکز ہے۔

مزید :

صفحہ اول -