ٹرمپ کا اعلان مسترد،سعودی عرب کے سابق انٹیلی جنس چیف نے غزہ کیلئے نئی تجویز دیدی
میونخ(ڈیلی پاکستان آن لائن ) سعودی عرب کے سابق انٹیلی جنس چیف شہزادہ ترکی نے غزہ کے لئے صدر ٹرمپ کا اعلان مسترد کرتے ہوئے نیا پلان تجویز دے دیا۔
نجی ٹی وی جیو نیوز کے مطابق عرب خبر رساں ادارے کو دیے گئے انٹرویو میں سعودی عرب کے سابق انٹیلی جنس چیف شہزاد ترکی الفیصل نے غزہ کے لوگوں کو بے دخل کرنے کے ٹرمپ کے پلان کو مسترد کرتے ہوئے کہا کہ امریکی صدر کا منصوبہ کہیں بھی قابل فروخت نہیں ہے۔
سابق انٹیلی جنس چیف نے غزہ کے لئے امریکی سربراہی میں مارشل پلان کی تجویز بھی دی۔
شہزادہ ترکی الفیصل کا کہنا تھا کہ غزہ کے لئے ٹرمپ کی تجویز ناقابل عمل ہے بلکہ واشنگٹن کو غزہ کی بحالی کے لئے مدد کرنی چاہئے تاکہ وہاں کے لوگ اپنی سرزمین پر رہیں۔
انہوںنے مزید کہا کہ ہمارے پاس ایک عرب امن پلان ہے جو ایک مکمل، جامع اور متبادل ہے، اس کے ذریعے علاقے میں جنگ کا خاتمہ ہوگا اور امن قائم ہوسکتا ہے۔
سابق انٹیلی جنس چیف کا کہنا تھا کہ امریکا دوسری عالمی جنگ کے بعد یورپ کے لئے منظور کئے جانے والے مارشل پلان کو غزہ کے لئے بھی نافذ کرسکتا ہے جس میں امریکا پورے خطے کی تعمیر نو کرے اور غزہ کی پٹی کو اکیلا چھوڑ دے تاکہ وہاں کے لوگ امن و سکون کے ساتھ رہ سکیں کیونکہ مارشل پلان کے تحت یورپینز نے تعمیر نو کے بعد وہاں سے منتقلی نہیں کی تھی۔
