اوباما "کوئیر" اور مشیل اوباما "مرد" ہیں، جس شخص نے یہ حقیقت آشکار کی اسے 2 ہفتوں میں ہی ختم کردیا گیا، ایلون مسک کے والد کا دعویٰ

واشنگٹن/ کیپ ٹاؤن (ڈیلی پاکستان آن لائن) دنیا کے امیر ترین شخص  ایلون مسک کے والد ایرول مسک نے ایک انٹرویو میں حیران کن اور متنازعہ دعویٰ کیا ہے کہ سابق امریکی صدر براک اوباما "کوئیر" ہیں اور ان کی اہلیہ سابق خاتونِ اول مشیل اوباما دراصل ایک "مرد" ہیں جو عورت کے لباس میں نظر آتی ہیں۔
نیوز 18 کے مطابق ایرول مسک نے یہ دعویٰ ایک پوڈکاسٹ انٹرویو کے دوران کیا۔  انہوں نے مزید کہا کہ یہ بات  پبلک نالج  ہے اور انٹرنیٹ پر اس کے کئی شواہد موجود ہیں۔ انٹرویو کے میزبان جوشوا روبن نے حیرت کا اظہار کرتے ہوئے پوچھا  " کیا مشیل اوباما واقعی مرد ہیں؟" جس پر ایرول نے جواب دیا "بالکل،  کیا تمہیں نہیں معلوم؟ تمہیں یہ  انٹرنیٹ  پر کہیں بھی  مل جائے گا۔"
ایرول مسک نے 2014 میں وائرل ہونے والی ایک سازشی تھیوری کا حوالہ بھی دیا جس میں مشہور کامیڈین جون ریورز نے مشیل اوباما کے بارے میں ایسا ہی مذاق کیا تھا۔ ایرول کے مطابق جون ریورز نے عوامی طور پر یہ بات کہی تھی اور اس کے صرف دو ہفتے بعد ان کی موت واقع ہو گئی۔ انہوں نے الزام لگایا کہ انہیں "ختم کر دیا گیا" کیونکہ انہوں نے یہ حقیقت سب کے سامنے بیان کر دی تھی۔
ایرول نے مزید کہا کہ مشیل اوباما کے ایسے کئی تصویری شواہد موجود ہیں جن میں وہ ٹریک سوٹ میں نظر آ رہی ہیں اور  ان میں واضح طور پر مردانہ خصوصیات نمایاں ہیں۔