حکومت کا انتخابات سے قبل پی آئی اے کو فروخت کرنے کا منصوبہ

اسلام آباد(مانیٹرنگ ڈیسک ) وفاقی حکومت نے عام انتخابات سے قبل پاکستان انٹرنیشنل ایئرلائن (پی آئی اے) کو فروخت کرنے کا منصوبہ بنالیا۔وزیر برائے نجکاری دانیال عزیز نے غیر ملکی میڈیا کو انٹرویو دیتے ہوئے کہا کہ حکومت نے پی آئی اے کو فروخت کرنے کا منصوبہ تیار کرلیا ہے جسے اگلے ہفتے کابینہ کمیٹی میں پیش کیے جانیکا امکان ہے جبکہ عام انتخابات سے پہلے پی آئی اے کی فروخت کی کوشش کریں گے۔ان کا کہنا تھا منصوبے کے تحت ایئرلائن کو پی آئی اے کے دیگر شعبوں بشمول ہوٹلز، کیٹرنگ اور مینٹینینس سے الگ کرنے پر توجہ دی جائے گی۔بعدازاں مرکزی ایئرلائن کو فروخت کردیا جائے گا۔دانیال عزیز کے مطابق پاکستان اسٹیل ملز کو خریدنے میں بھی دلچسپی ظاہر کی جارہی ہے۔ایک انگریزی اخبار کی رپورٹ میں نام لیے بغیر ایک آفیشل کا حوالہ دیتے ہوئے بتایا گیا ماضی میں امارات اور اتحاد ایئرلائن پی آئی اے کو خریدنے میں دلچسپی ظاہر کرچکے ہیں تاہم 2016 میں حکومت نجکاری سے پیچھے ہٹ گئی۔