لارڈز : انگلینڈ نے بھارت کو 86رنز سے بچھاڑ دیا

لارڈز : انگلینڈ نے بھارت کو 86رنز سے بچھاڑ دیا

لندن(نیٹ نیوز)بھارت اور انگلینڈ کے مابین جاری 3 ایک روزہ میچوں پر مشتمل سیریز کے دوسرے میچ میں میزبان انگلش ٹیم نے بھارتی سورماؤں کو 86رنز سے ہرا دیا ہے۔ جو روٹ سنچری سکور کرنے پر مین آف دی میچ رہے۔لارڈز میں انگلینڈ نے ٹاس جیت کر پہلے بیٹنگ کا فیصلہ کیا جو ان کے حق میں گیا اور ٹیم نے جو روٹ کی سنچری کی بدولت مقررہ اوورز میں 7 وکٹوں پرحریف ٹیم کے لیے 323رنز کا ہدف مقرر کردیا۔انگلش ٹیم کی جانب سے جو روٹ نے 113جبکہ کپتان ایون موگن 53 اورآل راؤنڈرڈیوڈ ولی 50رنز سکور کرکے نمایاں رہے جبکہ بھارتی بولرز کی جانب سے کلدیپ یادو نے 3 وکٹیں حاصل کیں۔بھارتی ٹیم 323رنز کے ہدف کے تعاقب میں 236رنز پر پویلین لوٹ گئی ، سریش رائنا 46 اور کپتان کوہلی 45رنز بنا کر نمایاں رہے جبکہ انگلش بولرز میں لیام پلنکٹ نے 4 جبکہ ڈیوڈ ولی اور عادل راشد نے 2،2 شکار کیے۔واضح رہے کہ انگلش ٹیم کی کامیابی کے بعد 3 میچوں کی سیریز ایک، ایک سے برابر ہوگئی جبکہ پہلا میچ بھارتی ٹیم نے 8 وکٹ سے جیتا تھا تاہم سیریز کا فیصلہ کن میچ لیڈز میں 17 جولائی کو کھیلا جائے گااور میچ جیتنے والی ٹیم سیریز ٹرافی کی حق دار بن جائے گی۔

مزید : کھیل اور کھلاڑی