حکومت کا فلم انڈسٹری کو باقاعدہ صنعت کا درجہ دینے , خصوصی پیکج کا اعلان

اسلام آباد(ویب ڈیسک)حکومت پاکستان نے فلم انڈسٹری کو صنعت کا درجہ دیتے ہوئے خصوصی پیکج کا اعلان کردیا اور وزیراعظم نےوزارت اطلاعات ونشریات و قومی ورثہ کو ہدایت کی  کہ وزارت خزانہ اور متعلقہ اداروں کے ساتھ باہمی مشاورت سے اس پیکج کو جلد نافذ العمل شکل میں حکومت پاکستان کو حتمی منظوری کے لئے پیش کرے۔

وزیراعظم نوازشریف نے کہاکہ ’فن اور فنکار پاکستانی معاشرے اور اس سے جڑی درخشاں روایات کے وہ امین ہیں جنہوں نے عالمی افق پر اس پاک سرزمین کے تشخص، ثقافت،ورثے اور ادب کو زندہ اور با ضمیر قوموں کی صف میں لا کھڑا کیا۔ اس فلمی صنعت کی بحالی کو یقینی بنانا ہمارے اولین فرائض میں شامل تھا اور میں انتہائی مسرت کے ساتھ اس صنعت سے وابستہ فنکاروں اور ہنر مندوں کے لیے پاکستان کی تاریخ کے سب سے بڑے اور خصوصی پیکیج کا اعلان کر رہا ہوں۔یہ یقیناً ہمارے باقی وعدوں کی طرح ایک اور وعدے کی تکمیل ہے۔

بد قسمتی سے گزشتہ کئی برسوں میں پاکستان اور اس کے غیور عوام نے دہشت گردی کے خوفناک عفریت کو ہماری گلیوں، مساجد، امام بارگاہوں،عوامی اجتماعات کی جگہوں پر محو رقص دیکھا۔لیکن الحمداللہ ہماری بہادر افواج اور قانون کے پاسبان اداروں کی قربانیوں اور قوم کے غیر متزلزل ارادوں کے باعث دہشتگردی میں نمایاں کمی آئی۔ماضی قریب گواہ ہے کہ اسلام اور قوم کے دشمنوں نے گمراہ کن دلائل کو جواز بنا کر اس قوم کے معصوم ازہان پر مختلف طریقوں سے وار کیے۔جس کے نتیجے میں وہشت اور دہشت پروان چڑھتی رہی۔عالمی منظر نامہ ہمارے مسخ شدہ تشخص کی منظر کشی اپنے اپنے انداز میں کرتا رہا۔
نوجواں جو حقیقتاً اس دھرتی کا مستقبل ہیں ایک خوف زدہ سوچ کے اسیر رہے۔ ان پاک ذہنوں سے خوفناک دور،دہشت اور مایوسی کی کالی گھٹا ؤں کو دور کرنے کے لیے ہم انہیں متبادل معیاری تفریح کے مواقع فراہم کر رہے ہیں۔ہم اس بات سے بخوبی آگا ہ ہیں کہ معیاری تفریح کا مطلب سیاحت، کھیل کے میدان، تفریحی پارکس، ثقافتی سرگرمیوں کے گرد گھومتا ہے جس کا مرکز یقیناً فلمی صنعت کی بحالی ہے۔ آج میں انتہائی فخر سے وزارت اطلاعات ونشریات و قومی ورثہ کی ارسال شدہ تجاویز کو مد نظر رکھتے ہوئے فلم کے بے نام اور بے شکل وجود کو با قاعدہ صنعت کا درجہ دینے کا اعلان کر رہا ہوں۔ جو1992میں ہمارے ہی دور حکومت کی منظور شدہ پالیسی کا تسلسل ہے۔اس کے ساتھ ساتھ اس صنعت سے وابستہ مالیاتی قوانین میں نرمی اور ٹیکس سے استثنیٰ کی سہولیات بھی فراہم کی جانی چا ہیں ۔
ادب اور فن کے دائرہ کار میں وہ تمام لوگ شامل ہیں جنہیں ہم ادیب، لکھاری،شاعر اور اہل قلم جیسے محترم الفاظ سے جانتے ہیں اور ان تمام قابل رشک اور معتبر شخصیات سمیت فنون لطیفہ کے فروغ کیلئے بھی ایک انتہائی ٹھوس اور جامع پیکیج تیار کیا جائیگا۔ اس پیکیج کے تحت بین الاقوامی معیار کو مد نظر رکھتے ہوئے” نیشنل فلم اینڈ براڈ کاسٹنگ کمیشن“ ، ”نیشنل فلم انسٹیٹیوٹ اور اکیڈمی“ کا قیام عمل میں لایا جاے گا جو بلا شبہ جدید اسٹوڈیو اور دور حاضر اور مستقبل میں ٹیکنالوجی کے حوالے سے کسی بھی جدت سے ہم آہنگ آلات سے مزئین ہوں گے۔
فنکاروں کے مالی معاملات میں بہتری اور فلاح و بہبود کیلئے ”پرائم منسٹر آرٹسٹ ویلفیئر فنڈ“کے قیام کا بھی اعلان کرتا ہوں۔تا کہ ان خوبصورت اور با صلاحیت افراد کی عزت نفس کی ہر ممکن حفاظت کی جا سکے۔
اس ارض وطن کا ایک ایک کونہ خدائے بزرگ و برتر کے جمیل ہونے کی دلیل ہے۔ اس حوالے سے غیر ملکی فلم سازوں کو پاکستان کے سیاحتی، ثقافتی،تاریخی اور پر فضا مقامات پر فلم بنانے پر خصوصی رعایت دی جا یگی تا کہ اس میڈیم کے ذریعے قومی اور بین الاقوامی سیاحت کو فروغ حاصل ہو۔
فلمی صنعت سے متعلق آلات اور سامان کی درآمد پر خصوصی رعایت دی جایگی تا کہ اس صنعت کے ذریعے پاکستان کا خوبصورت اور حقیقی چہرہ دنیا کو دکھایا جا سکے۔ اور پاکستان کے مقامی فلم ساز کو ملک میں ہی وہ تمام سہولیات میسر ہوں جن کے لیے ان کو بیرون ملک جانا پڑتا ہے۔
یقیناًان تمام عوامل کے علاوہ بھی ہمیں چند قدم اور آگے بڑھنا ہے تا کہ عملی طور پر اس صنعت سے جڑے ہوئے ہر فرد کی حوصلہ افزائی ہو سکے۔اسی تناظر میں حکومت کی جانب سے تفریحی ٹیکس (انٹرٹینمنٹ ڈیوٹی)پر مکمل چھوٹ دینے کا فیصلہ کیا گیا ہے اور اس سے منسلک آمدن ٹیکس میں مراعات کواور بڑھایا جائے گا
ہمارے آنے والے کل کے معمار بچوں کو ان کے با وقار ماضی، بے مثل ورثے، قابل تقلید ثقافت، معتبر ادب اور لازوال حسن سے آراستہ سیاحت سے روشناس کرانے والی تمام افلام پر کی جانے والی سرمایہ کاری کو مزید محفوظ بنانے کیلئے خاص فوائد اور سہولیات بھی دی جائیں گی۔
فنون لطیفہ فلم اور براڈ کاسٹنگ انڈسٹری کی معاونت کے لیے میں ”پرائم منسٹر فلم فائنانس فنڈ“کے قیام کا بھی اعلان کرتا ہوں جو بلا شبہ فلم سازی کے لیے ایک انتہائی غیر معمولی قدم ہے۔پاکستانی معیشت جو کہ آہستہ آہستہ استحکام اور مضبوطی کی منزل کی جانب رواں دواں ہے بلا شبہ فلم اور براڈ کاسٹنگ صنعت کی شمولیت اسے مضبوط بنانے میں اپنا بھر پور کردار اد ا کرے گی۔
مجھے یقین کامل ہے کہ حکومتی سطح پر اٹھائے گئے یہ اقدامات اس صنعت سے منسلک مسائل اور مشکلات کو ختم کرنے کے لیے انتہائی کرامت ثابت ہوں گے اور مجھے اس بات پر بھی فخر ہے کہ اس سرزمین نے فنون لطیفہ میں وہ نام پیدا کیے جن کی چھاپ رہتی دنیا تک مختلف اقوام کے لیے آگے بڑھنے کا وسیلہ ہیں۔ ٹیلنٹ اور جذبے سے بھر پور نوجوان نسل باقی شعبوں کی طرح اس شعبے میں بھی پاکستان کے نام کو آگے بڑھانے میں کوئی کسر اٹھا نہ رکھے گی اور عوام کی منتخب حکومت کو ہر قدم پر اپنا ہمسفرپائے گی‘۔