کراچی کنگز نے اسلام آباد یونائیٹڈ کو 4 وکٹ سے شکست دے دی

  کراچی کنگز نے اسلام آباد یونائیٹڈ کو 4 وکٹ سے شکست دے دی

  



کراچی(مانیٹرنگ ڈیسک)پی ایس ایل فائیو کے 28 ویں میچ میں کراچی کنگز نے اسلام آباد یونائیٹڈ کو شکست دیدی۔نیشنل اسٹیڈیم کراچی میں کھیلے گئے پاکستان سپر لیگ کے 28 ویں میچ میں اسلام آباد یونائیٹڈ نے پہلے بیٹنگ کرتے ہوئے مقررہ 20 اوورز میں صرف 136 رنز بنائے۔قبل ازیں کراچی کنگز کے کپتان عماد وسیم نے ٹاس جیت کر پہلے اسلام آباد یونائیٹڈ کو بیٹنگ کی دعوت دی۔ مہمان ٹیم کی جانب سے فل سالٹ اور رضوان حسین نے ٹیم کو 35 رنز کا آغاز فراہم کیا، رضوان 17 اور سالٹ 25 رنز بنانے کے بعد آؤٹ ہوئے جس کے بعد حسین طلعت بیٹنگ کیلئے آئے اور 37 رنز کی ذمہ دارانہ اننگز کھیل کر آؤٹ ہوئے۔پی ایس ایل فائیو میں اپنی بیٹنگ صلاحیتوں سے بھرپور فائدہ اٹھانے والے لیگ سپنر شاداب خان اس بار صرف 12 رنز کے ہی مہمان ثابت ہوئے، کولن انگرام کی اننگز بھی 14 رنز تک محدود رہے جب کہ آصف علی ایک بار پھر ناکام رہے اور صرف 2 رنز بنانے کے بعد چلتے بنے۔کراچی کنگز کی جانب سے افتخار احمد، ارشد اقبال، کرس جورڈن، عماد وسیم اور عمید آصف نے ایک ایک وکٹ حاصل کی۔اسلام آباد یونائیٹڈ کے 137 رنز کے ہدف کے تعاقب میں کراچی کنگ کی بیٹنگ شروع ہوئی۔ شرجیل خان اور بابر اعظم نے اوپننگ کی۔ شرجیل خان 14 گیندوں پر دھوں دھار 37 رنز بناکر عاکف جاوید کی گیند پر ایل بی ڈبلیو ہوگئے جب کہ بابر اعظم 20 گیندوں پر 19 رنز بناکر موسی کی گیند پر کلین بولڈ ہوگئے۔ان کے بعد آنیوالے کیمرون ڈیلپورٹ نے 11 رنز بنائے جنہیں شاداب خان نے پویلین روانہ کردیا اور افتخار احمد محض ایک رنز بناکر شاداب خان کی گیند پر آصف علی کو کیچ دے بیٹھے۔ عماد وسیم نے 26 اور والٹن نے 11 رنز سکور کیے۔ کرس جورڈن 6 اور عمید آصف 13 رنز بناکر ناٹ آؤٹ رہے۔ کنگز نے 19.2 اوورز میں 137 رنز کا ہدف حاصل کرلیا۔اسلام آباد یونائیٹڈ کی جانب سے بالنگ میں شاداب خان نے دو جب کہ محمد موسی، ظفر گوہر، عاکف جاوید اور رومان رئیس نے ایک ایک وکٹ حاصل کی۔کراچی کنگز میں الیکس ہیلز کی وطن واپسی کے بعد کیمرون ڈیلپورٹ کو پلینگ الیون میں شامل کیا گیاجب کہ اسلام آباد یونائیٹڈ میں غیرملکی کھلاڑیوں میں صرف فل سالٹ اور کولن انگرام شامل تھے۔

میچ

مزید : صفحہ اول