نعتِ رسولؐ مقبول

چودھری دِلّو رام کوثری


درجہ ہے سب رسولوں سے بڑھ کر رسولؐ کا
ثانی کوئی نہیں پس داور رسولؐ کا

کہتے ہیں جس کو عرش بریں جملہ قدسیاں
اپنی نگاہ میں ہے وہ منبر رسولؐ کا

اُمّی لقب اگرچہ تھا اُس شاہ کا مگر
تھا صدر علم صدرِ منور رسولؐ کا

مصر و عرب میں،روم میں، ایراں میں،ہند میں
پھیلا جہاں میں علم سرا سر رسولؐ کا

کیوں کوثری مجھے ہو طلب عز و جاہ کی!
کیا کم ہے یہ شرف، ہوں ثنا گر رسولؐ کا
***