وزیر اعلیٰ مریم نوا زسے جرمن کمپنی میٹرو کی سینئر وائس پریزیڈنٹ کی ملاقات،سرمایہ کاری اور اقتصادی ترقی کے فروغ پر گفتگو

لاہور ( ڈیلی پاکستان آن لائن )وزیراعلیٰ پنجاب مریم نواز  سے جرمن ملٹی نیشنل کمپنی میٹرو کی سینئر وائس پریزیڈنٹ ای ون جولیٹا بولو(Ivonne Julitta Bollow) نے ملاقات کی جس میں میٹرو اور پنجاب حکومت کے درمیان روزگار کے مواقع پیدا کرنے کیلئے شراکت داری کے امکانات کا جائزہ لیا گیا۔ ملاقات میں پنجاب میں سرمایہ کاری اور اقتصادی ترقی کے فروغ کے امور پر گفتگو کی گئی۔ پنجاب میں میٹرو کے کاروباری آپریشنز کو وسعت دینے ممکنہ مواقع،باہمی ترقی اور کامیابی کے لیے ممکنہ شراکت پر تبادلہ خیال کیا گیا۔

 وزیر اعلیٰ مریم نواز نے کہا کہ پنجاب میں سرمایہ کاری کے  لیےموزوں ترین ماحول میسر ہے۔ بیرونی سرمایہ کار ی اور بزنس میں توسیع پربھرپور معاونت کی جائے گی۔ ذخیرہ اندوزی اور مہنگائی کے تدارک کے لیے انفورسمنٹ اتھارٹی قائم کی جارہی ہے۔ پنجاب میں میٹرو کے توسیعی منصوبے صوبے کے لوگوں کے لیے مزید ملازمتیں اور مواقع پیدا کریں گے۔

ای ون جولیٹا بولو نے کہا کہ میٹرو پنجاب میں چھوٹے اور درمیانے درجے کے کاروبار کی ترقی کے مواقع فراہم کررہا ہے۔ پاکستان میں میٹرو اے جی بزنس ٹو بزنس (B2B) طبقے کے لیے بہت سی سروسز فراہم کرتا ہے۔ 

سینئر صوبائی وزیر مریم اورنگزیب، سینیٹر پرویز رشید، چیف سیکرٹری اور دیگر حکام بھی اس موقع پر موجود تھے۔