پر امن احتجاج کرناجے یو آئی (ف) کا حق ہے
پاکستان پیپلز پارٹی کے مرکزی رہنما چودھری محمد اسلم گل نے کہا ہے چیئرمین پیپلز پارٹی بلاول بھٹو پارٹی کا موقف دے چکے ہیں پارٹی کسی بھی دھرنا سیاست کا نہ تو ماضی میں حصہ بنی اور نہ ہی اب ہم کسی دھرنا سیاست کا حصہ بنیں گے،لیکن ہم مولانا فضل الرحمن کے سیاسی مطالبات کے پہلے دن سے ہی حامی ہیں اور اب بھی ان کے سیاسی مطالبات کی مکمل حمایت کرتے ہیں۔ایشو آف دی ڈے میں بات کرتے ہوئے ان کا کہنا تھا پلان بی بھی جے یو آئی کے اپنے احتجاجی پروگرام کا ایک حصہ ہے جس کے مطابق وہ آگے بڑھ رہے ہیں پر امن احتجاج کرنا جے یو آئی کا حق ہے اب یہ حکومت کا فرض بنتا ہے وہ ان سے بات چیت کرکے مسائل کا حل نکال لیں کیونکہ انہوں نے تو اپنا دھرنا ختم کرکے حالات اور خون خرابہ ہونے سے ملک کو بچا لیا ہے۔