بہاؤ الدین زکریا یونیورسٹی ملتان کو مالی بحران کا سامنا ہے اور لگ بھگ 40 کروڑ روپے خسارے کے باعث ملازمین کو تنخواہوں کی ادائیگی میں مشکلات کا سامنا ہے۔ میڈیا رپورٹس کے مطابق یونیورسٹی میں بلوچستان اور خیبرپختونخوا کے دو ہزار طلبہ مفت تعلیم حاصل کر رہے ہیں جنہیں خسارے کی ایک وجہ قرار دیا جا رہا ہے۔ حکومت نے اِن طلباء کی فیسیں ادا کرنے کا وعدہ کیا تھا تاہم وہ یونیورسٹی کو نہیں دی گئیں۔ مذکورہ یونیورسٹی مالی خسارے میں کمی لانے اور آمدن بڑھانے کے لئے سپرنگ سمیسٹر متعارف کرانے کے علاوہ پاکستان سٹڈیز، ہسٹری، جینڈر سٹیڈیز اور لائبریری سائنسز سمیت چند دیگر شعبوں کو ضم کرنے کے بارے میں بھی غور کر رہی ہے کیونکہ اِن شعبوں میں ضرورت سے کم داخلے ہوئے ہیں۔ واضح رہے کہ اسلامیہ یونیورسٹی بہاولپور کو بھی مالی خسارے کا سامنا ہے۔ حکومت اور ہائر ایجوکیشن کمیشن کو چاہئے کہ وہ جنوبی پنجاب کی اِن دونوں جامعات کے خسارے کا نوٹس لیتے ہوئے اِنہیں مطلوبہ فنڈز فراہم کرے تاکہ تعلیم اور تدریس کا سلسلہ بغیر کسی پریشانی کے جاری رہے۔
٭٭٭٭٭