جمہوریت کا راستہ روکنے والے مٹ جائیں گے‘ جاوید ہاشمی

  جمہوریت کا راستہ روکنے والے مٹ جائیں گے‘ جاوید ہاشمی

  

کرمانوالہ (این این آئی)  پاکستان اور جمہوریت لازم و ملزوم ہے اس کا راستہ روکنے والے مٹ جائینگے،پاکستان صرف جمہوریت کے ساتھ ہی رہ سکتا ہے جمہوریت اور جمہوری قوتوں کی بالا دستی ہو گی تو ملک ترقی کرے گا۔جمہوریت کی کرن دبانے والے خود دب کر مٹ جائیں گے ریاست مدینہ کا تصور دینے والے حکمرانوں کے دور میں ایک خاتون کو اسکے بچوں کے سامنے جس درندگی کا نشانہ بنایا گیا اس پر عمران خان کو مستعفی ہو جانا چاہیئے۔ان خیالات کا اظہارسینئر سیاستدان و پاکستان مسلم لیگ ن کے مرکزی رہنمامخدوم جاوید ہاشمی نے میڈیا سے ایک ملاقات میں کیا۔انہوں نے کہا کہ ریاست مدینہ میں ایسا تو تصور بھی نہیں کیاجا سکتا اگر پاکستان کو ریاست مدینہ ہی بنانا ہے تو پھر ریاست مدینہ کے قوانین نافذ کئے جائیں۔ انہوں نے کہا کہ قوم ایسے درندوں کو کبھی معاف نہیں کرے گی جو عورتوں کی عصمت دری کرتے ہیں۔ حکومت کو چاہیئے کہ ایسے درندوں کو پکڑ کر کیفر کردار تک پہنچایا جائے تاکہ آئندہ کبھی کسی کو ایسی جرات کرنے کا حوصلہ نہ ملے۔ایک سوال کے جواب میں انہوں نے کہا کہ مسلم لیگ ن میں ن اور ش کی تقسیم کے بارے میں باتیں وہ کر رہے ہیں جو کل تک مشرف کے ساتھی تھے۔مسلم لیگ ن اس ملک کی سب سے بڑی سیاسی قوت ہے اور حقیقت ہے کہ آج بھی اس کا ووٹ بنک سب سے زیادہ ہے۔انہوں نے کہا کہ یہ نواز شریف ہی ہیں جنہوں نے تین بار اقتدار اعلیٰ دیکھنے کے بعد جیلوں کو چوم لیا ایسی قربانیاں دینے والی پارٹیاں اور قیادت کیسے تقسیم ہو سکتی ہے۔

جاوید ہاشمی

مزید :

صفحہ اول -