میرے دل میں جنگل ہے | اصغر ندیم سید|
میرے دل میں جنگل ہے
میرے دل میں جنگل ہے
اور اس میں بھیڑیا رہتا ہے
جو رات کو میری آنکھوں میں آ جاتا ہے
اور سارے منظر کھا جاتا ہے
صبح کو سورج اپنے پیالے سے شبنم ٹپکاتا ہے
اور دن کا بچہ
میری روح کے جھولے میں رکھ جاتا ہے
میرے دل میں جنگل ہے
اور اس میں فاختہ رہتی ہے
جو اپنے پروں سے میرے لئے
اک پرچم بنتی رہتی ہے
اور خوشبو سے اک نغمہ لکھتی رہتی ہے
پھر تھک کر میرے بالوں میں سو جاتی ہے
میرے دل میں جنگل ہے
اور اس میں جوگی رہتا ہے
جو میرے خون سے اپنی شراب بناتا ہے
اور اپنے ستار میں چھپی ہوئی لڑکی کو
پاس بلاتا ہے
پھر جنگل بوسہ بن جاتا ہے
میرے دل میں جنگل ہے
اور اس میں بھولا بھٹکا زخمی شہزادہ ہے
جس کا لشکر
خون کی دھار پہ اس کے پیچھے آتا ہے
وہ اپنے وطن کے نقشے کو زخموں پہ باندھ کے
آخری خطبہ دیتا ہے
پھر مر جاتا ہے
میرے دل میں جنگل ہے
اور اس میں گہری خاموشی ہے
شاعر:اصغر ندیم سید
(شعری مجموعہ: ادھوری کلیات، سالِ اشاعت، 2014)
Meray Dil Men Jangal Hay
Aor Iss Men Bhairrya Rehta Hay
Jo Raat Ko Meri Aankhon Men Aa Jaata Hay
Aor Saaray Manzar Kha Jaata Hay
Subh Ko Sooraj Apnay Payaalay Say Shabnam Tapkaata Hay
Aor Din Ka Bacha
Meri Rooh K Jhoolay Men Rakh Jaata Hay
Meray Dil Men Jangal Hay
Aor Iss Men Faakhta Rehti Hay
Jo Apnay Paron Say Meray Liay
Ik Parcham Bunti Rehti Hay
Aor Khushbu Say Ik Naghma Likhti Rehti Hay
Phir Thak Kar Meray Baalon Men So Jaati Hay
Meray Dil Men Jangal Hay
Aor Iss Men Jogi Rehta Hay
Jo Meray Khoon Say Apni Sharaab Banaata Hay
Aor Apnay Sitaar Men Chhupi Hui Larrki Ko
Paas Bulaata Hay
Phir Jangal Bosa Ban Jaata Hay
Meray Dil Men Jangal Hay
Aor Iss Men Bhoola Bhattka Zakhmi Shzaada Hay
Jiss Ka Lashkar
Khoon Ki Dhaar Pe Uss K Peechhay Aata Hay
Aor Apnay Watan K Naqshay Ko Zakhmon Pe Baandh Kar
Aakhri Khutba Deta Hay
Phir Mar Jaata Hay
Meray Dil Men Jangal Hay
Aor Iss Men Gehri Khamoshi Hay
Poet: Asghar Nadeem Sayed
