طیارہ حادثہ میں ایک ہی خاندان کے 6افراد جاں بحق ،اکیلی لڑکی بچ گئی ،اہل خانہ اسے دوست کے گھر چھوڑ کر گئے، انشورنس اور امدادی معاوضے کی مد میں ملنے والی رقم کا سن کر رشتہ داروں کی ’رال ٹپکنے‘ لگی

اسلام آباد(مانیٹرنگ ڈیسک)پی آئی اے طیارہ حادثہ میں چترال کے رہنے والے ایک ہی خاندان کے چھ افراد جاں بحق ہو گئے ہیں اور خاندان میں صرف ایک 14سالہ حسینہ گل ہی بچی ہے جو کہ اس حادثے کے باعث نفسیاتی مسائل کا شکار ہے اور اس کا پمز ہسپتال میں علاج بھی جاری ہے ۔
تفصیلات کے مطابق حسینہ گل کے امتحانات جاری تھے جس کے باعث وہ جہاز پر اپنے اہل خانہ کے ساتھ سفر نہ کر سکی اور اس کے اہل خانہ حسینہ گل کو گھر میں اکیلا چھوڑنے کے بجائے اس کی دوست کے گھر چھوڑ کر گئے تھے لیکن طیارہ حادثہ میں معصوم لڑکی کا پورا خاندان ہی جاں بحق ہو گیا جس کے بعد حکومت کی جانب سے حسینہ گل کو اس کے اہل خانہ کی ہلاکت پر امداد اور انشورنس کی مد میں تین کروڑ تیس لاکھ روپے معاوضہ ملنا ہے جس کے بارے میں سن کر معصوم لڑکی کے رشتہ داروں کے منہ سے ’رال ٹپکنے ‘لگ گئی ہے اور وہ حسینہ گل کو اپنے ساتھ لے جانے کیلئے آمنے سامنے آ گئے ہیں جبکہ حسینہ گل کی پھوپھی اور چچا اسے لینے کیلئے پمز ہسپتال بھی پہنچ گئے ہیں ۔خاندانی ذرائع کا کہناہے کہ حسینہ گل کی پھوپھی اس کا نکاح اپنے بیٹے کے ساتھ کروانا چاہتی ہے جبکہ حسینہ گل تو ابھی محض 14برس کی ہے اور اس کے رشتہ دار پیسے کا سن کر پاگلوں کی طرح لڑکی کو اپنے ساتھ لے جانے کیلئے کوششیں اور سازشیں کر رہے ہیں ۔

حسینہ گل کا کہناہے کہ وہ ابھی پڑھنا چاہتی ہے اس لیے اگر وہ اپنے رشتہ داروں کے ساتھ چترال گئی تو وہ اسے پڑھنے نہیں دیں گے اور حسینہ گل نے اس حوالے سے حکومت سے مد د کی اپیل کی ہے ۔ابتدائی طور پر حسینہ گل کے رشتہ داروں کی تصدیق کرنے کیلئے ٹیم بھی چترال بھیجی جائے گی کیونکہ گاﺅں کے متعدد خاندان حسینہ گل کے رشتہ دار ہونے کے دعویدار ہیں ۔پی آئی اے کی جانب سے ابتدائی طور پر جاں بحق ہونے والے افراد کے اہل خانہ کو پانچ لاکھ روپے فی کس تدفین کیلئے دیئے جارہے ہیں ۔