قومی کھلاڑی کراچی ٹیسٹ کیلئے پرجوش، کس کا کیا کہنا ہے؟ آپ بھی جانئے

قومی کھلاڑی کراچی ٹیسٹ کیلئے پرجوش، کس کا کیا کہنا ہے؟ آپ بھی جانئے
قومی کھلاڑی کراچی ٹیسٹ کیلئے پرجوش، کس کا کیا کہنا ہے؟ آپ بھی جانئے

  

کراچی (ڈیلی پاکستان آن لائن) پاکستانی ٹیسٹ سکواڈ میں شامل کھلاڑی شہر قائد میں سری لنکا کے خلاف شیڈول ٹیسٹ میچ کیلئے انتہائی پرجوش ہیں اور پاکستان کرکٹ بورڈ(پی سی بی) نے کراچی ٹیسٹ کے حوالے سے کھلاڑیوں کے تاثرات پر مشتمل ایک وڈیو سوشل میڈیا پر جاری کی ہے جس میں کھلاڑیوں نے ماضی کے تجربات اور دوسرے ٹیسٹ کے حوالے سے نیک خواہشات کا اطہار کیا ہے۔

قومی ٹیسٹ سکواڈ کے کپتان اظہر علی کا کہنا ہے کہ کراچی میں پاکستان کا ریکارڈ انتہائی شاندار رہا ہے اور یہاں کھیلنا ہمارے لئے بہت بڑی خوشی کی بات ہے۔شان مسعود نے کہا کہ نیشنل سٹیڈیم میں ہونے والی کرکٹ سے شائقین میں اس کھیل سے دلچسپی پیدا ہوتی تھی۔ یہاں میں نے بڑے یادگار مقابلے دیکھے ہیں، 1996ءکے ورلڈ کپ میں پاکستان اور جنوبی افریقہ کا میچ سٹیڈیم میں ہی دیکھا تھا، اس کے علاوہ ایک پاک بھارت سنسنی خیز ون ڈے میچ بھی سٹیڈیم میں ہی دیکھا تھا جس میں بھارت کے سپنر راجیش چوہان نے چھکا مار کر کھیل کا پانسہ پلٹ دیا تھا۔

اسد شفیق نے بتایا کہ انہوں نے کراچی کے نیشنل سٹیڈیم میں ایک میچ دیکھا تھا جس میں محمد آصف نے سچن ٹنڈولکر کو آؤٹ کیا تھا، وہ سپیل آج بھی یاد ہے، گراؤنڈ میں موجود شائقین بہت پرجوش تھے، خود ان کا گلہ نعرے لگانے کی وجہ سے بیٹھ گیا تھا۔

فواد عالم نے کہا کہ ٹیسٹ کرکٹ کی بحالی کے بعد ہم نے پہلا ٹیسٹ راولپنڈی میں کھیلا اور اب دوسرا میچ کراچی میں کھیلیں گے، یہ بات کراچی اور سندھ کے لوگوں کے لئے بڑی خوش آئند ہے، امید ہے شائقین گراؤنڈ میں آکر ہماری حوصلہ افزائی کریں گے۔

وکٹ کیپر بیٹسمین محمد رضوان نے کہا کہ وہ گزشتہ 3 سال سے پاکستان سپر لیگ (پی ایس ایل) میں کراچی کنگز سے کھیلتے ہیں اور اب تو کراچی مجھے اپنا ہی شہر لگنے لگا ہے۔بابراعظم نے کہا کہ کراچی میں ہماری کوشش ہوگی کہ اپنی پوری صلاحیتوں کو بروئے کار لائیں اور بیٹنگ کے ساتھ باﺅلنگ میں بھی اچھی پرفارمنس دیں۔

مزید :

کسان پاکستان -