خانیوال کےضمنی انتخاب کامکمل نتیجہ آنے سے قبل ہی شہباز شریف نے پیغام جاری کردیا
لاہور(ڈیلی پاکستان آن لائن)مسلم لیگ ن کےصدراورقائدحزبِ اختلاف شہبازشریف نےخانیوال کےضمنی انتخاب میں شاندارکارکردگی پرپارٹی کارکنان کوخراج تحسین پیش کرتے کہا ہےکہ جنوبی پنجاب کے عوام نے نواز شریف اور پاکستان مسلم لیگ ن پر اعتماد کیا ہے۔واضح رہے کہ خانیوال کے حلقہ پی پی 206کے ضمنی الیکشن کے نتائج آنےکا سلسلہ جاری ہے تاہم اب تک کے غیر حتمی اور غیر سرکاری نتائج کے مطابق ن لیگی امیدوار کو واضح برتری حاصل ہے اور ان کی جیت یقینی سمجھی جا رہی ہے۔
تفصیلات کے مطابق شہباز شریف کاکہناتھا کہ جنوبی پنجاب اور خانیوال کے عوام کا خاص طور پر شکریہ ادا کرتے ہیں، عوام کے اعتماد پر پورا اتریں گے ،خانیوال کا الیکشن جنوبی پنجاب میں مسلم لیگ ن کی عوامی خدمت کا اعتراف ہے ،ن لیگ نے جنوبی پنجاب کو جو ترقی دی، عوام نے اس پر اپنے اعتماد کی مہر لگائی ہے۔انہوں نے کہا کہ جنوبی پنجاب کے عوام کی خدمت اور ان کے حقوق کے تحفظ کا سفر مزید قوت سے آگے بڑھائیں گے، پارٹی قائدین اور کارکنان کا شبانہ روز محنت پر شکریہ ادا کرتا ہوں اور شاباش دیتا ہوں، آپ نے ٹیم ورک، یکسوئی اور نظریاتی جذبے کا مثالی مظاہرہ کیا، آپ پر فخر ہے۔
واضح رہے کہ پنجاب اسمبلی کے حلقہ پی پی 206 میں ہونے والے ضمنی انتخاب کےغیر حتمی و غیر سرکاری نتائج کی آمد کا سلسلہ جاری ہے، ا ب تک 150 پولنگ سٹیشنز کے غیر حتمی اور غیر سرکاری نتائج موصول ہوچکے ہیں جن کے مطابق پاکستان مسلم لیگ(ن) کے رانا محمد سلیم 35 ہزار 728 ووٹ لے کر پہلے نمبر پر ہیں۔ پاکستان تحریک انصاف کی امیدوار نورین نشاط ڈاہا 25 ہزار ووٹ 638 لے کر دوسرے جبکہ پاکستان پیپلز پارٹی کے سید واثق آٹھ ہزار 621 ووٹ لے کر تیسرے نمبر پر ہیں۔
