ملک قرضوں پر چل رہا ہے ، عوام کو بیوقوف بنا کر حکومت نہیں کر سکیں گے : خورشید شاہ

اسلام آباد(مانیٹرنگ ڈیسک)قائد حزب اختلاف خورشید شاہ نے کہاہے کہ ہمارا ملک قرضوں کے سر پر چل رہاہے،ہمارے حکمرانوں نے الیکشن میں جیت حاصل کرنے کیلئے عوام کو مقروض کردیاہے۔تفصیلات کے مطابق میڈیا سے گفتگو کرتے ہوئے سید خورشید شاہ نے کہاکہ حکمران عوام کو بیوقوف بنا کرحکومت نہیں کرسکیں گے۔ ٹیکسٹائل انڈسٹری بند ہوچکی ہے حکومت کو چا ہئے کہ انڈسٹری کو سبسڈی دے جبکہ سیکڑوں مزدور بیروزگار ہیں اور بے روزگاری سے جرائم کی شرح میں اضافہ ہوتا ہے ،اگر حکومت جرائم پر قابو پانا چاہتی ہے تو سب سے پہلے بے روزگاری کو کنٹرول کرے۔انہوں نے حکومت سے سوال کیا کہ اس نے محکمہ صحت اور تعلیم کے لئے کیااقدامات کئے ہیں؟عوام کے سامنے جھوٹے اقدامات کے دعوے کئے جارہے ہیں،جھوٹ کے پلندوں پر سیاست کبھی بھی نہیں ہوسکتی۔خورشید شاہ نے تنقید کی توپوں کا رخ شہباز شریف کی جانب کرتے ہوئے کہا کہ وزیراعلی پنجاب کو پورے صوبے کے بارے میں سوچنا چاہئے لیکن ان کی تمام تر توجہ لاہورکی جانب ہے۔کیا مسلم لیگ (ن )صرف لاہور کے لئے ہے؟حکمرانوں کو چاہئے کہ غیرجانبداری کامظاہرہ کرتے ہوئے فیصلے کیاکریں جبکہ آئین کے مطابق ہرشہری کوتحفظ دیناحکومت کی ذمہ داری ہے، لیکن ہماری حکومت کو پل اور ٹرینیں بنانے سے فرصت ملے تو وہ عوام کے تحفظ بارے میں بھی سوچے۔
خورشید شاہ