گورنمنٹ ہائی سکول شپانکو بازار پسنی میں جاری گولڈن ویک اختتام پذیرہوگیا
پسنی (ڈیلی پاکستان آن لائن )گورنمنٹ ہائی سکول شپانکو بازار پسنی میں جاری گولڈن ویک اختتام پذیرہوگیا۔ گولڈن ویک کی اختتامی تقریب کے مہمان خاص میونسپل کمیٹی پسنی کے چیرمین عبدالحکیم بلوچ تھے۔ اسٹیج سکریٹری کے فرائض کامران اسلم نے سرانجام دئیے۔
تقریب سے وائس چیرمین میونسپل کمیٹی پسنی کے بی سعید، ڈپٹی ڈسٹرکٹ ایجوکیشن آفیسر اخلاق احمد، سابق ڈپٹی ڈی ڈی او پسنی اکبر مرزا، نالج ان انگلش لینگوئج سینٹر کے ڈائریکٹر راشد حیدر، رائٹر اور مصنف ظریف بلوچ ،سابق یوسی ناظم عزیز پیربخش،پیرامیڈیکل اسٹاف کے یوسف معیار، جی ٹی اے کے حنیف داد اور ہیڈ ماسڑ گورنمنٹ ہائی سکول شپانکو بازار نصیر احمد نے خطاب کرتے ہوئے کہا کہ ایک صحت مند معاشرے کے لئے نصابی سرگرمیوں کے ساتھ غیر نصابی سرگرمیوں کا انعقاد ضروری ہے۔ کیونکہ صحت مند معاشرے کے لئے صحت مند دماغ کا ہونا ضروری ہے۔سماجی برائیوں سے بچنے کے لئے معاشرے میں اسپورٹس کو فروغ دینا ضروری ہے۔تعلیم یافتہ قوموں کی ترقی کا دارومدار تعلیم پر منحصر ہے۔ تعلیم کے زیور سے آراستہ ہوکر ہم مسقبل کے چیلنجز کا مقابلہ کرنے کے اہل ہوں گے۔ طلبا کو تعلیم کے ساتھ سماجی کاموں میں بھی بڑھ چڑھ کر حصہ لینا ہے۔کیونکہ آج کے طلبا کو کل اس شہر کی ذمہ داریاں نبھانا ہوتے ہیں۔ اسپورٹس نوجوان نسل کو منشیات سے دور رکھتا ہے۔کسی بھی قوم کی تعمیر و ترقی میں نوجوان نسل کا اہم رول ہوتا ہے۔ اس طرح کے پروگراموں میں طلبا کے اندر موجود صلاحیتوں میں نکھار پیدا ہوتی ہے۔
پروگرام سے خطاب میں چیرمین میونسپل کمیٹی عبدالحکیم کا کہنا تھا کہ محدود وسائل کے باوجود تعلیم اور اسپورٹس کو اولین ترجیح دینی چاہئے ۔ تعلیمی حوالے سے ہم پسماندہ ہیں۔ ہمیں ترقی یافتہ قوموں کے صفوں میں کھڑا ہونے کے لئے تعلیم پر توجہ دے کر سخت محنت کرنا ہوگا۔ انہوں نے گولڈن ویک کے پوزیش ہولڈر طلبا کے لئے بیس ہزار روپیے دینے کا اعلان کیا۔ڈپٹی ڈسٹرکٹ ایجوکیشن آفیسر اخلاق احمد نے طلبا کو مخاطب کرتے ہوئے کہا کہ آپ لوگوں کو اس شہر کی ترقی میں کردار ادا کرنا ہے کیونکہ آج ہم جس مقام پر ہیں ،کل آپ لوگ یہاں ہوں گے۔ پروگرام کے آخر میں گولڈن ویک میں شاندار پرفارمنس دکھانے والے طلبا میں انعامات اور ونر و رنر ٹیموں میں انعامات تقسیم کئے گئے۔
