نوازشریف سعودی عرب کب جارہے ہیں ؟ مقامی اخبار نے بڑا دعویٰ کر دیا
لاہور(ڈیلی پاکستان آن لائن )سوشل میڈیا پر گزشتہ کئی روز سے یہ چہ مگوئیاں جاری ہیں کہ سابق وزیراعظم نوازشریف جلد ہی سعودی عرب کا دورہ کرنے جارہے ہیں جو کہ ملک کی موجودہ سیاسی صورتحال کے پیش نظر نہایت اہمیت کا حامل قرار دیا جارہاہے تاہم اب مقامی اخبار میں شائع خبر میں بھی ا س معاملے پر روشنی ڈالی گئی ہے ۔
مقامی اخبار ” جنگ نیوز “ میں صحافی ’ پرویز بشیر ‘کی خبر شائع ہوئی ہے جس میں دعویٰ کیاگیاہے کہ مسلم لیگ ن کے قائد اور سابق وزیراعظم نوازشریف گزشتہ ایک سال سے لندن میں قیام پذیر ہیں لیکن چند روز کے بعد کچھ دن کیلئے سعودی عرب کے دورے پر جارہے ہیں ۔
مقامی اخبار نے اپنی رپورٹ میں نوازشریف کے قریبی ذرائع کے حوالے سے کہاہے کہ وہ سعودی عرب میں دو سے تین ہفتے تک قیام کر سکتے ہیں اور پھر واپس لندن ہی جائیں گے ، اس دورے میں وہ عمرے کی سعادت بھی حاصل کریں گے ۔ بتایا جارہاہے کہ سعودی عرب کے دورے کے دوران نوازشریف کی طاقت ور شخصیات سے ملاقاتیں بھی متوقع ہیں ۔
