ڈیرہ اسماعیل خان، جماعت اسلامی کی مہنگائی، بد امنی وآئی ایم ایف کی غلامی کیخلاف احتجاجی ریلی
ڈیرہ اسماعیل خان(بیورورپورٹ)جماعت اسلامی ڈیرہ کے زیر اہتمام ملک میں بڑھتی ہوئی مہنگائی‘بدامنی‘بے روز گاری‘ کرپشن اور آئی ایم ایف کی غلامی کیخلاف حق نواز پارک سے احتجاجی ریلی نکالی گئی‘ جس کی قیادت ضلعی امیر جماعت اسلامی مولانا سلیم اللہ ارشد،نائب صدر عقیل ڈمرہ‘زاہد محب اللہ ایڈوکیٹ اور جنرل سیکرٹری حاجی بشیر ہرگن نے کی‘ جبکہ ریلی میں انجمن تاجران کے صدر سہیل احمد اعظمی‘ سینئر نائب صدر چوہدری جمیل احمد‘نعیم قریشی‘ حاجی محمد نواز سمیت دیگر تاجر تنظیموں کے نمائندوں اور جماعت اسلامی کے ذمہ دارا ن نے بڑی تعداد میں شرکت کی‘ریلی مختلف راستوں سے ہوتی ہوئی شہر کے وسط چوگلیہ پر پہنچ کر جلسہ میں تبدیل ہوگئی‘ریلی کے شرکاء نے ہاتھوں میں کتبے اور بینرز اٹھا رکھے تھے‘ اس موقع پر خطاب کرتے ہوئے ضلعی امیر جماعت اسلامی مولانا سلیم اللہ ارشد نے کہا ملک میں کمر توڑ مہنگائی‘ بدامنی اور بے روزگاری ہے‘ لوگوں کے گھروں میں فاقے ہیں‘ کھانے پینے کی اشیاء کی قیمتیں آسمانوں کو چھو رہی ہیں جماعت اسلامی عوام کے ساتھ ہے انہوں نے کہاکہ علاقے کی معروف سماجی شخصیت سردار بابر خان میانخیل نے آج ریلی میں شرکت کی ہے‘ اور وہ جلد اپنے ساتھیوں سمیت جماعت اسلامی میں شمولیت کا اعلان کرینگے۔
