امن، ترقی اور حقیقی خوشحالی کیلئے موجودہ حکمرانوں سے نجات ضروری: سراج الحق

          لاہور (آن لائن) امیر جماعت اسلامی سراج الحق نے کہا ہے کہ تینوں بڑی سیاسی جماعتوں نے آئین پاکستان سے ہمیشہ بے وفائی کی، یرونی ایجنڈے کے تحت اس کے خلاف قانونی سازی کرتی رہیں۔ آئین فلاحی اور اسلامی ریاست کا پورا نقشہ پیش کرتا ہے، لیکن بدقسمتی سے آج تک اس پر مکمل عمل درآمد نہیں کیا گیا، جماعت اسلامی اقتدار میں آ کر اس پر عمل کو یقینی بنائے گی۔ امن، ترقی اور حقیقی خوشحالی کے لیے موجودہ حکمرانوں سے نجات ضروری ہے۔ پی ڈی ایم، پی ٹی آئی اور پیپلزپارٹی ٹرائیکا کی سیاست نے پاکستان کو سو سال پیچھے دھکیل دیا، ان لوگوں کو ایک صدی بھی مل جائے تو یہ ملک کو خوشحالی کی جانب نہیں لے جا سکتے۔ گزشتہ 75برسوں سے کرپٹ ٹرائیکا مختلف ناموں، پارٹیوں اور جھنڈوں سے قوم پر مسلط ہے، انھوں نے ملک کے نظریہ اور جغرافیہ کے ساتھ غداری کی۔ حکمرانوں نے ملک میں عدل و انصاف قائم کرنے کی بجائے مفادات کی سیاست کی، چند خاندان اور مفاد پرست ٹولہ مختلف پارٹیوں میں موجود ہے اور انھیں استعمال کر رہا ہے خیبرپختونخوا کی عوام پی ٹی آئی کی حکومت سے تنگ آ چکے، صوبہ میں دس برس حکومت کرنے کے بعد عوام کو ترقی دینے کی بجائے انھیں آٹے کی لائنوں میں کھڑا کر دیاکے پی حکومت کا خاتمہ لوگوں کے لیے خوشی اور نجات کا سبب بنے گا۔ صوبائی حکومت نے صوبے کو کھنڈر بنا دیا، امن و امان کی صورتحال انتہائی مخدوش، نوجوان ایک کروڑ نوکریوں کے لیے ترس رہا ہے عوام 50لاکھ گھروں کی تلاش میں ہیں، کسی کو گھر ملا نہ نوکری، ان کے تمام اعلانات اور وعدے جھوٹ کا پلندہ ثابت ہوئے خیبرپختونخواہ میں طویل حکمرانی کرنے کے باوجود یہ ناکام اور نامراد ہوئے۔ مسائل کی وجہ حکمرانوں کی مس مینجمنٹ اور خراب طرز حکمرانی ہے۔ جماعت اسلامی قوم کی حقیقی ترجمان اور حقیقی اپوزیشن جماعت ہے۔ ان خیالات کا اظہار انھوں نے احیاالعلوم تیمرگرہ دیرپائن میں ختم بخاری شریف کی تقریب سے خطاب کرتے ہوئے کیا۔ سراج الحق نے کہا کہ جماعت اسلامی کو اقتدار ملا تو کرپٹ مافیا اور کرپٹ ٹرائیکا کا حقیقی احتساب کرے گی۔ جماعت اسلامی چاہتی ہے کہ ملک میں قرآن و سنت کی حکمرانی ہو، غریب اور امیر کو آگے بڑھنے کے لیے یکساں مواقع فراہم ہوں جماعت اسلامی کی صورت میں منظم جماعت ہی ملک کے مسائل حل کر سکتی ہے۔  
سراج الحق