مری میں پی ٹی آئی کی سابق ایم پی اے پر نامعلوم ملزمان کی فائرنگ
راولپنڈی (ویب ڈیسک) پاکستان تحریک انصاف کی سابق رکن اسمبلی عابدہ راجہ پر نامعلوم افراد نے فائرنگ کی جس میں وہ معجزانہ طور پر بچ گئیں۔
ایکسپریس نیوز کے مطابق مری میں پی ٹی آئی کی سابق ایم پی اے عابدہ راجہ پر موٹرسائیکل سواروں نے فائرنگ کی، جس کے نتیجے میں گولی اُن کی گاڑی کے ٹائر پر لگی۔ پی ٹی آئی کی سابق رکن اسمبلی نے کہا کہ مری انگوری پولیس کے پاس کوئی گاڑی ہی نہیں جو فوری پہنچتی، دو پولیس اہلکار گھنٹوں بعد بمشکل جائے وقوعہ پر پہنچے اور پولیس نے کوئی کارروائی بھی نہیں کی۔
بعد ازاں ڈی پی او مری فراز احمد نے ایم پی اے پر فائرنگ واقع کا نوٹس لیا اور ابتدائی تحقیقات کے بعد بتایا کہ عابدہ راجہ انگوری کے علاقے میں اپنا گھر تعمیر کررہی ہیں، انہوں نے دعویٰ کیا کہ دو لوگوں نے فائرنگ کی۔ڈی پی او نے ایس ڈی پی او مری کو فوری قانونی کا رروائی کرنے کا حکم دیتے ہوئے متعلقہ افسران کو میرٹ پر تفتیش کرتے ہوئے ملوث ملزمان کو فوری گرفتاری کی ہدایت کی۔
پولیس نے واقعے کی تمام زاویوں پر تحقیقات شروع کردی جبکہ ڈی پی او نے ملزمان کی جلد گرفتاری کی یقین دہانی کراتے ہوئے کہا کہ پولیس شہریوں کی جان و مال سے کھیلنے کی اجازت نہیں دے گی۔
