’’اگر آپ یہ ویڈیو دیکھ رہے ہیں تو میں مر چکی ہوں یا۔۔۔‘‘ دبئی کی شہزادی کی ویڈیو سامنے آگئی، اس میں کیا کہا ہے؟ جان کر آپ بھی پریشان ہوجائیں گے کیونکہ۔۔۔۔
ابوظہبی(مانیٹرنگ ڈیسک) یہ ساڑھے چار ماہ قبل کی بات ہے کہ جب دبئی کے حکمران شیخ محمد بن راشد المکتوم کی بیٹی شہزادی شیخہ لطیفہ بن محمد المکتوم کے متحدہ عرب امارات سے فرار ہو جانے کی خبر سامنے آئی۔ ناز و نعم میں پرورش پانے والی اس شہزادی نے شاہی زندگی کی پابندیوں سے بغاوت کر دی تھی لیکن آزادی کی اس کوشش کے بعد اب یہ بھی معلوم نہیں کہ وہ زندہ بھی ہیں یا نہیں۔
غیر ملکی میڈیا کے مطابق مہینوں کی منصوبہ بندی کے بعد یہ شہزادی ایک لگژری کشتی میں فرار ہوئیں جو ایک سابق فرانسیسی جاسوس کی ملکیت بتائی جاتی ہے۔ میڈیا رپورٹس کے مطابق جونہی یہ کشتی انٹر نیشنل سمندری حدود میں داخل ہوئی تو مسلح کمانڈوز نے اس پر دھاوا بول دیااور عملے کی مار پیٹ کرتے ہوئے شہزادی کو اپنے ساتھ لے گئے۔ اس کے بعد سے کچھ معلوم نہیں تھا کہ وہ کہاں ہیں ، زندہ بھی ہیں یہ نہیں۔
میل آن لائن کے مطابق اب اس کہانی میں ایک اور تہلکہ خیز موڑ آ گیا ہے۔ ایک انسانی حقوق تنظیم کی جانب سے شہزادی شیخہ لطیفہ کی ایک ویڈیو جاری کی گئی ہے جو انہوں نے متحدہ عرب امارات سے فرار ہوتے وقت اپنے آخری پیغام کے طور پر ریکارڈ کی تھی۔ اس ویڈیو میں وہ کہتی ہیں ’’ جلد ہی میں یہاں سے فرار ہونے والی ہوں لیکن مجھے معلوم نہیں کہ اس کا نتیجہ کیا ہوگا۔ اگر آپ یہ ویڈیو دیکھ رہے ہیں تو یہ بہت اچھی بات نہیں ہے ۔ اس کا مطلب یہ ہے کہ میں دنیا سے رخصت ہوچکی ہوں یا بے حد برے حالات میں ہوں۔ ‘‘
یہ ویڈیو ایک برطانوی تنظیم ’’ Detained in Dubai‘‘ نے جاری کی ہے۔ یہ تنظیم متحدہ عرب امارت میں قانونی مسائل سے دوچار افراد کو مدد فراہم کرتی ہے۔ تنظیم کا کہنا ہے کہ شہزادی کے بارے میں کچھ معلوم نہیں کہ وہ اب کس حال میں ہیں، تاہم اس ویڈیو کے جاری کئے جانے کا یہی مطلب لیا جا رہا ہے کہ وہ کسی المناک انجام سے دوچار ہو چکی ہیں۔
ویڈیو دیکھیں:
