عمران خان نے ویرات کوہلی کوٹنڈولکر سے بہتر بیٹسمین قرار دیدیا

اسلام آباد(آئی این پی)پاکستان کرکٹ ٹیم کے سابق کپتان عمران خان نے بھارتی کرکٹر ویراٹ کوہلی کو سچن ٹنڈولکر سے بہتر بیٹسمین قرار دیتے ہوئے کہا ہے کہ ویرات کوہلی ایک مکمل بلے باز ہیں۔بھارتی اخبار کو انٹرویو میں سابق کپتان نے کہا کہ میں نے جن کھلاڑیوں کو دیکھا ہے ان میں ویرات کوہلی مکمل کھلاڑیوں میں سے ایک ہیں۔ پاکستان کے سابق آل رانڈر کا کہنا تھا کہ میں نے کرکٹ میں مختلف ادوار گزرے ہیں۔ سنہ 80 کی دہائی میں ویوین رچرڈز تھے، پھر برائن لارا اور پھر سچن ٹنڈولکر نمایاں رہے۔عمران کے مطابق اب ویرات کوہلی نمایاں ہیں۔ انھوں نے کہاکہ وہ بہت باصلاحیت ہیں۔ وہ دونوں پیروں پر کھیلتے ہیں اور وہ میدان کے ہر کونے میں شاٹ کھیل سکتے ہیں۔انھوں نے کہا ان کی صلاحیت اور تکنیک سے قطع نظر ان کا مزاج بہت عمدہ ہے۔ ان کا مزاج سچن سے بہتر ہے۔ کوہلی مشکل مواقع پر اچھی کارکردگی کا مظاہرہ کرتے ہیں جبکہ ایسے بعض موقعوں پر سچن ایسا نہیں کر پاتے تھے۔ انھوں نے کہا کہ حالیہ ورلڈ کپ میں پاکستان کی ہار کو دیکھنا بہت تکلیف دہ تھا لیکن کوہلی نے بہت عمدہ کھیل کا مظاہرہ کیا۔انھوں نے مزید کہا کہ میں بیٹسمینوں کو بولر کی نظر سے دیکھتا ہوں اور یہ سوچتا ہوں کہ انھیں کیسے آؤٹ کیا جائے۔ ذرا غور کریں کوہلی مشکل حالات میں کیسے کھیلتا ہے۔ وہ کسی سے بھی بہتر ہے۔ میں کہوں گا کہ وہ بین الاقوامی سطح پر اس وقت بہترین ہے۔ آپ ان پر کسی میچ میں بھی بھروسہ کر سکتے ہیں۔