ٹرمپ کو ایک اور دھچکا ،عدالت نے ریاست ہوائی میں مسلم ممالک کے شہریوں پر سفری پابندی کا نیا حکم نامہ معطل کر دیا

ٹرمپ کو ایک اور دھچکا ،عدالت نے ریاست ہوائی میں مسلم ممالک کے شہریوں پر سفری ...
ٹرمپ کو ایک اور دھچکا ،عدالت نے ریاست ہوائی میں مسلم ممالک کے شہریوں پر سفری پابندی کا نیا حکم نامہ معطل کر دیا

  


واشنگٹن (ڈیلی پاکستان آن لائن )امریکی صدر ٹرمپ کیلئے ایک اور ناکامی ، ریاست ہوائی میں 6مسلم ملکوں کے شہریوں پرسفری پابندیوں کے نئے حکم نامے کو بھی معطل کر دیا گیا ۔ ٹرمپ نے عدالتی فیصلے کو سپریم کورٹ میں چیلنج کرنے کا اعلان کیا ہے۔

جیو نیوز کے مطابق وفاقی جج کی عدالت نے ریاست ہوائی میں 6مسلم ملکوں کے شہریوں پر سفری پابندی کے حوالے سے ٹرمپ کے دوسرے حکم نامے کو عمل درآمد شروع ہونے سے چند گھنٹے پہلے معطل کر دیا۔

دوران سماعت جج نے کہا ہے کہ ہوائی کا یہ موقف کہ نیا حکم نامہ امریکی آئین کی خلاف ورزی ہے اور تعصب پر مبنی ہے درست لگتا ہے۔ نئے حکم نامے کو چیلنج کرنیوالوں کا موقف تھاکہ یہ بھی پہلے حکم نامے کی طرح مسلمانوں سے تعصب پر مبنی ہے۔

جج نے کہا کہ حکومت ہوائی نے درخواست کی ہے کہ اگر ریلیف نہ دیا گیا تواس سے ناقابل تلافی نقصان ہوسکتاہے۔ انصاف اورعوامی مفاد کو سامنے رکھتے ہوئے ریلیف کو منظور کیا جائے۔

نئے حکم نامے میں صومالیہ، ایران، سوڈان، شام اور لیبیا پرامریکی ویزے کی پابندی عائد کی گئی تھی جبکہ عراق کو پابندی کی فہرست سے نکال دیا گیا تھا۔

ادھر امریکی صدر ٹرمپ نے عدالت کے فیصلے پر کہا ہے کہ سفری پابندی کے خلاف فیصلہ دیکر عدالت نے اختیار سے تجاوز کیا ہے۔عدالت کے فیصلے سے کمزور امریکا کا تصور جائے گا اور سفری پابندی کے عدالتی فیصلے کو سپریم کورٹ میں چیلنج کروں گا۔

مزید : بین الاقوامی /اہم خبریں


loading...