سخت پابندی کے باوجود پتنگ بازی جاری ، پولیس نے 13ملزمان کو گرفتار کر لیا
لاہور (خبر نگار) صوبائی دارالحکومت میں سخت پا بندی کے با وجود بھی پتنگ بازی کا سلسلہ جاری رہا ۔ تفصیلات کے مطابق صوبائی دارالحکومت میں نوجوان پتنگ بازی پر پابندی کے باوجود بھی چھتوں پر چڑھ کر پتنگ بازی کرتے رہے ۔ واضح رہے کہ حکومت پنجاب کی جانب سے پتنگ بازی پر پابندی عائد کی گئی ہے مگر پولیس اس قاتل کھیل کو روکنے میں ناکام ہو چکی ہے ، پولیس خانہ پری کے لئے بے قصور نوجوانوں کو گھروں سے اٹھا کر ان کے خلاف مقدمات درج کرکے افسران کو سب اچھا کی رپورٹ دے رہی ہے ۔ پتنگ بازی جن علاقوں میں عروج پر رہی، ان میں بھاٹی گیٹ، شاہدرہ، شفیق آ باد ، راوی روڈ، لاڑی اڈا، بادامی باغ، اسلام پورہ ، داتا دربار،مستی گیٹ، نولکھا، گوالمنڈی، موچی گیٹ، مصر ی شاہ، شاد باغ، قلعہ گجر سنگھ، گڑھی شاہو،سول لائنز،لٹن روڈ،مزنگ، شالیمار، گجر پورہ، مغل پورہ، غازی آ باد ،ہر بنس پورہ ،باغبا نپورہ ،بر کی ، فیکٹری ایریا ، مناواں ، لیاقت آ باد ،اچھرہ،غالب مارکیٹ ،کوٹ لکھپت ، ساندہ ، اقبال ٹاؤن ،گلشن راوی ،سمن آ باد،ملت پارک، نواں کوٹ، شیرا کوٹ،رائیونڈ سٹی،نواب ٹاؤن،چو ہنگ،گرین ٹاؤن ، ٹاؤن شپ وغیرہ شامل ہیں۔دریں اثناء لاہور پولیس نے شہر میں پتنگ بازوں کے خلاف کارروائی کرتے ہوئے13 پتنگ بازوں کو گرفتار کرکے ملزمان کے خلاف مقدمات درج کر لیے۔تفصیلا ت کے مطابق ڈی آئی جی آپریشز ڈاکٹر حیدر اشرف نے تمام ڈویژنل ایس پیز کو خصوصی پولیس ٹیمیں تشکیل دے کر شہر میں پتنگ بازی کے خلاف سخت کارروائی کرنے کا حکم دیا تھا جس پر شہر میں10مقدمات درج کرکے13ملزمان کو گرفتار کرلیا۔ملزمان کے قبضہ سے45سے زائد پتنگیں، 08چرخیاں اور 03پنی ڈور برآمدکرلیں۔
