اے مری ہم رقص مجھ کو تھام لے | ن م راشد |
رقص
اے مری ہم رقص مجھ کو تھام لے
زندگی سے بھاگ کر آیا ہوں میں
ڈر سے لرزاں ہوں کہیں ایسا نہ ہو
رقص گہ کے چور دروازے سے آ کر زندگی
ڈھونڈ لے مجھ کو، نشاں پا لے مرا
اور جرم عیش کرتے دیکھ لے!
اے مری ہم رقص مجھ کو تھام لے
رقص کی یہ گردشیں
ایک مبہم آسیا کے دور ہیں
کیسی سرگرمی سے غم کو روندتا ہوں میں!
جی میں کہتا ھوں کہ ہاں،
رقص گہ میں زندگی کے جھانکنے سے پیشتر
کلفتوں کا سنگریزہ ایک بھی رہنے نا پائے!
اے مری ہم رقص مجھ کو تھام لے
زندگی میرے لیے
ایک خونیں بھیڑ یے سے کم نہیں
اے حسین و اجنبی عورت اسی کے ڈر سے میں
ہو رہا ہوں لمحہ لمحہ اور بھی تیرے قریب
جانتا ھوں تو مری جاں بھی نہیں
تجھ سے ملنے کا پھر امکاں بھی نہیں
تو مری ان آرزوؤں کی مگر تمثیل ھے
جو رھیں مجھ سے گریزاں آج تک!
اے مری ہم رقص مجھ کو تھام لے
عہد پارینہ کا میں انساں نہیں
بندگی سے اس در و دیوار کی
ہو چکی ہیں خواہشیں بے سوز و رنگ و ناتواں
جسم سے تیرے لپٹ سکتا تو ہوں
زندگی پر میں جھپٹ سکتا نہیں!
اس لیے اب تھام لے
اے حسین و اجنبی عورت مجھے اب تھام لے!
شاعر: ن م راشد
(شعری مجموعہ: ماورا )
Raqs
Ay Miri Ham Raqs Mujh Ko Thaam Lay
Zindagi Say Bhaag Kar Aaya Hun Main
Dar Say Larzaan Hun Kahen Aisa Na Ho
Raqs Gah K Chor Darwaazay Say Aa Kar Zindagi
Dhoond Lay Mujh Ko , Mishaan Paa Lay Mira
Aor Jurm-e-Aish Kartay Daikh Lay
Ay Miri Ham Raqs Mujh Ko Thaam Lay
Raqs Ki Yeh Gardashen
Aik Mubhim Aasiya K Daor Hen
Kaisi Sargarmi Say Gham Ko Raundta Hun Main
Ji Men Kehta Hun Keh Haan
Raqs Gah Men Zindagi K Jhaanknay Say Paishtar
Kalfaton Ka Sangraiza Aik Bhi Rehnay Na Paaey
Ay Miri Ham Raqs Mujh Ko Thaam Lay
Zindagi Meray Liay
Aik Khoonen Bhairraiay Say Kam Nahen
Ay Haseen -o-Anjabi Aorat Usi K Dar Say Main
Ho Raha Hun Lamha Lamha Aor Bhi Teray Qareeb
Jaanta Hun Tu Miri Jaan Bhi Nahen
Tujh Say Milnay Ka Phir Imkaan Bhi Nahen
Tu Miri Aarzuon Ki Magar Tamseel Hay
Jo Raheen Mujh Say Guraizaan Aaj Tak
Ay Miri Ham Raqs Mujh Ko Thaam Lay
Ehd-e-Paareena Ka Main Insaan Nahen
Bandagi K Iss Dar-o-Dewaar Ki
Ho Chuki Hen Khaahishen Be Soz-o-Rang-o-Natawaan
Jism Say Teray Lipatt Sakta To Hun
Zindagi Par Main Jhapatt Sakta Nahen
Iss Liay Ab Thaam Lay
Ay Haseen-o-Anjabi Aorat Mujhay Thaam Lay
Poet: Noon Meem Rashid