اضافی بل دینا ہوگا،کراچی میں از خود گیزر چارجز کی وصولی شروع ، سوئی سدرن کی انوکھی منطق 

کراچی(ڈیلی پاکستان آن لائن )سوئی سدرن گیس کمپنی نے صارفین سے از خود گیزر چارجز کی وصولی شروع کردی۔ 
ایس ایس جی سی نے اس حوالے سے صارفین کو اضافی بل بھی بھیجنا شروع کردیے ہیں۔ کراچی کے صارفین کو ایس ایس جی سی کی جانب سے کونیکل بیفل (Conical Baffle) چارجز کے نام سے 2085 روپے کے اضافی بل بھیجنا شروع کردیے گئے ہیں جبکہ کمپنی نے کونیکل بیفل کا استعمال لازمی قرار دیتے ہوئے ایک کمپنی کو اس کی تنصیب کا ٹھیکہ بھی دے دیا۔ 
گلستان جوہر میں رہنے والے گیس صارفین نے بتایا کہ انہیں اضافی بل بھیجے جارہے ہیں، اس سلسلے میں جب ہم نے کمپنی سے رابطہ کیا تو ہمیں بتایا گیا کہ ایس ایس جی سی نے گیزر استعمال کرنے والوں کے لئے کونیکل بیفل کااستعمال لازم کردیا ہے۔ 
صارفین کا کہنا ہے کہ ہم نے کمپنی کو بتایا کہ ہمارے ہاں تو گیزر نہیں ہیں ہم سے یہ چارجز کیوں لئے جا رہے ہیں تو مزید انکشاف ہوا کہ کمپنی نے کونیکل بیفل کی انسٹالیشن کے لئے ایک کمپنی کو ٹھیکہ دے دیا ہے اس لئے گیزر استعمال کریں یا نہ کریں چارجز تو ادا کرنا پڑیں گے۔
واضح رہے کہ گیزر میں کونیکل بیفل کا استعمال ضروری ہے، اس سے گیس کے استعمال میں 25 فیصد تک کی بچت ہوگی لیکن حیران کن بات یہ ہے کہ جب سے کراچی میں ایس ایس جی سی نے رات کی گیس لوڈ شیڈنگ کا نظام متعارف کرایا ہے اس وقت سے گیس کے گیزر کا استعمال ختم ہو تا جا رہا ہے۔