اسلام آباد (ڈیلی پاکستان آن لائن)پی ٹی آئی کے ذرائع نے آزاد اراکین کی جانب سے 26 ویں آئینی ترمیم کے حق میں ووٹ ڈالنے کا امکان ظاہر کرتے ہوئے کہا ہے کہ 3 اراکین کا پارٹی قیادت سے رابطہ منقطع ہو گیا ہے۔
"ایکسپریس نیوز "کا پی ٹی آئی ذرائع کے حوالے سے بتانا ہے کہ آئینی ترامیم کے معاملے پر 3 اراکین اسمبلی کے غائب ہونے کا انکشاف کرتے ہوئے بتایا کہ 3 اراکین کا پارٹی قیادت سے رابطہ ختم ہوگیا ہے۔
انہوں نے کہا کہ قومی اسمبلی کے حلقہ این اے-59 سے آزاد امیدوار اورنگزیب کھچی سے پی ٹی آئی کی قیادت کا رابطہ نہیں ہو پا رہا ہے۔ ساہیوال سے جیتنے والے آزاد امیدوار عثمان علی بھی پی ٹی آئی قیادت سے رابطے میں نہیں ہیں۔
پارٹی ذرائع کا کہنا تھا کہ ظہور قریشی پی ٹی آئی قیادت کو ٹال مٹول کرنے لگے ہیں اور ہمیں کہہ رہے ہیں کہ ملک سے باہر ہوں جبکہ وہ ملک میں ہی موجود ہیں۔
ذرائع نے خدشہ ظاہر کیا کہ پی ٹی آئی کے آزاد اراکین کا آ ئینی ترمیم کے حق میں ووٹ دیئے جانے کا امکان ہے۔
خیال رہے کہ صدر مملکت آصف علی زرداری نے قومی اسمبلی اور سینیٹ کے علیٰحدہ علیٰحدہ اجلاس طلب کر لیے ہیں، جس میں 26ویں آئینی ترمیم کا مسودہ پیش کیے جانے کا امکان ہے۔
دوسری جانب پی ٹی آئی نے آئینی ترمیم کیلیے بلائے جانے والے قومی اسمبلی کے اجلاس کے بائیکاٹ پر غور شروع کردیا ہے۔