ماحول دوست وژن، پنجاب میں فصل کی باقیات جلانے کا رجحان بدلنے لگا
لاہور( ڈیلی پاکستان آن لائن ) وزیراعلیٰ مریم نواز کے ماحول دوست وژن کی بدولت پنجاب میں فصل کی باقیات جلانے کا رجحان بدلنے لگا ۔
تفصیلات کے مطابق پنجاب کے مختلف اضلاع اور علاقوں میں فصل جلانے کے بجائے جانوروں کے چارے کے طورپر استعمال کرنے کا آغاز کر دیا گیا ہے ۔پنجاب میں پہلی بار کسانوں نے جدید مشینری کے استعمال سے فصل کی باقیات جلانے کے بجائے جدید انداز سے جمع کرکے ایک نئی تاریخ قائم کی گئی ، 14 دیہاتوں کے کل 11205 ایکڑ رقبے سے جدید مشینری کی مدد سے فصل کی باقیات جمع کی گئی۔پنجاب کی تاریخ میں پہلی دفعہ 5 ہزار سپر سیڈر سے2 لاکھ رقبہ کاشت ہوا جو جلایا نہیں گیا۔
ضلع چنیوٹ، اوکاڑہ، پاکپتن، نارووال اور فیصل آباد کے کسانوں نے جدید مشینری کے استعمال سے فصل کی باقیات کو چارے کے طورپر گانٹھوں کی شکل میں جمع کیا ،ضلع چنیوٹ کے موضع جات رائے چند، جیل بھٹیان، راؤ باغ، طاہر آباد، موضع احمد آباد، اوکاڑہ، سوہبا، دیپالپورمیں جدید مشینری کے استعمال سے سموگ کی صورتحال میں نمایاں بہتری آئی ۔
تحصیل اوکاڑہ کے چک 18، جی ڈی، ہجرا شاہ مقیم اینڈ شیرگڑھ کے علاوہ ضلع پاکپتن میں گاؤں ٹبی لال بیگ، قبولیت، گاؤں ساندے خان، گاؤں فرید پور دوگران میں بھی جدید مشینری استعمال کی گئی ۔نارووال کے موضع کالا قادر اور فیصل آباد میں موضع ستیانہ میں کسانوں نے جدید مشینری سے فصل کی باقیات کو جلانے کے بجائے چارے کے طورپر استعمال کا آپشن استعمال کیا ۔
اس عمل میں جدید مشینری کی مدد لی گئی، ٹرالیوں کے ذریعے فصل کی باقیات کو کھیتوں سے دوسرے مقامات پر منتقل کیا گیا ،ضلع چنیوٹ کے 5 دیہات میں 4700 ایکڑ رقبہ سے فصل کی باقیات جمع کی گئی ۔اوکاڑہ کے 4 دیہات کا 3350 ایکڑ، پاکپتن کے 3 دیہات کا 1845 ایکڑ، نارووال کے 1 دیہات میں 725 ایکڑ رقبے سے باقیات جمع کی گئیں ۔فیصل آباد کے 1 گاؤں میں 585 ایکڑ سے فصل کی باقیات جمع کی گئیں ۔
وزیراعلیٰ مریم نواز نے سموگ پر قابو پانے کے لئے انتظامی کے ساتھ جدید مشینری کے فروغ کے لئے بھی اقدامات کیے ،جدید مشینری کے استعمال سے فصل کی باقیات جلانے کے رجحان کی حوصلہ شکنی کی گئی ۔ماضی میں فصل کی باقیات جلانےسے پیدا ہونے والا دھواں سموگ کا باعث بن رہا تھا ۔
وزیراعلیٰ پنجاب مریم نواز نے کہا ہے کہ جدید مشینری کے استعمال سے سموگ پر قابو پانے میں مدد ملنا خوش آئند ہے،فصل جلانے کے بجائے چارے کے طورپر استعمال میں لانے والے کسانوں کو خراج تحسین پیش کرتی ہوں۔جدید مشینری اور جدید طریقوں کے استعمال سے پنجاب میں ماحولیاتی بہتری لانا اولین مشن ہے۔
