ٹی 20سیریز ، کالی آندھی نومبر میں پاکستان کا رخ کر یگی

ٹی 20سیریز ، کالی آندھی نومبر میں پاکستان کا رخ کر یگی

  

لاہور (سپورٹس رپورٹر ) پاکستان اور ورلڈ الیون کے مابین قذافی سٹیڈیم لاہور میں سیکیورٹی کے بے مثال انتظامات کے بعد ویسٹ انڈیز کے دورہ پاکستان کی راہ ہموار ہوگئی ، چیئرمین پاکستان کرکٹ بورڈ نجم سیٹھی نے اعلان کیا ہے کہ ویسٹ انڈین کرکٹ ٹیم رواں سال نومبر میں تین ٹی20 میچوں کی سیریز کیلئے پاکستان کا دورہ کرے گی،پاکستان کرکٹ بورڈ نے ورلڈ الیون کے میچز دیکھنے کیلئے ویسٹ انڈین کرکٹ بورڈ کے صدر ڈیو کیمرون کو دعوت دی تھی تاکہ وہ 14 رکنی اسکواڈ کے دورے کے سلسلے میں کیے گئے سکیورٹی انتظامات کا جائزہ لے سکیں،چیئرمین پی سی بی نے پاکستان آمد پر ڈیو کیمرون کا شکریہ ادا کرتے ہوئے کہا کہ ویسٹ انڈین بورڈ کے سربراہ کی آمد سے ویسٹ انڈین ٹیم کے دورہ پاکستان کی راہ ہموار ہوئی،انہوں نے کہا کہ رواں سال نومبر میں ویسٹ انڈین ٹیم تین ٹی20 میچوں کیلئے پاکستان کا دورہ کرے گی تاہم میچز کن شہروں میں منعقد کیے جائیں گے اس بات کا ابھی فیصلہ نہیں ہو سکا،یاد رہے کہ مارچ 2009 میں سری لنکن ٹیم پر دہشت گرد حملے کے بعد پاکستان پر عالمی کرکٹ کے دروازے بند ہو گئے تھے اور آٹھ سال کے دوران زمبابوے کے علاوہ کسی بھی ٹیم نے پاکستان کا دورہ نہیں کیا لیکن ورلڈ الیون کے دورہ پاکستان سے ملک میں انٹرنیشنل کرکٹ کی بحالی کے امکانات روشن ہوئے ہیں جبکہ سری لنکن کرکٹ بورڈ بھی کہہ چکا ہے کہ اگر وہ ورلڈ الیون کو فراہم کیے گئے سکیورٹی انتظامات پر مطمئن ہوتے ہیں تو ایک ٹی20 میچ کیلئے ٹیم پاکستان بھیجیں گے۔

مزید :

کھیل اور کھلاڑی -