خاتون نے شوہر کو اپنی ماں کے ساتھ رنگے ہاتھوں پکڑ لیا، کتنے سال سے یہ شرمناک سلسلہ جاری تھا؟

لندن (ڈیلی پاکستان آن لائن)  ایک خاتون نے سوشل میڈیا پلیٹ فارم ریڈٹ پر ایک ایسا انکشاف کیا ہے جس نے ہر پڑھنے والے کو جھنجھوڑ کر رکھ دیا۔ اس نے بتایا کہ کس طرح 22 سال بعد اسے یہ پتہ چلا کہ اس کا شوہر دراصل اس کی  ماں کے ساتھ خفیہ تعلقات میں تھا ،  ایک ایسا تعلق جو اس وقت سے قائم تھا جب وہ صرف 18 سال کا تھا۔

دی مرر کی رپورٹ کے مطابق خاتون جس کی عمر اب تقریباً 40 سال ہے، نے بتایا کہ اس نے اپنے شوہر کے ساتھ 15 سال کی عمر میں تعلق قائم کیا تھا اور 17 سال کی عمر میں حاملہ ہونے کے بعد وہ دونوں اس کے والدین کے ساتھ رہنے لگے۔ 18 سال کی عمر میں ان کی شادی ہو گئی اور والدین کے کہنے پر وہ اپنے دادا دادی کے پرانے گھر میں منتقل ہو گئے۔ ان کی زندگی میں چار بچے اور ایک خوشحال گھریلو ماحول تھا، اور سب کچھ بظاہر ٹھیک چل رہا تھا۔

تاہم سب کچھ اس وقت بدل گیا جب وہ دوستوں کے ساتھ سفر سے واپس آئی اور اپنے شوہر کو اپنی ماں کے ساتھ بستر پر دیکھ لیا۔ حیران کن طور پر اس کی ماں کو شرمندگی کے بجائے غصہ آیا اور وہ اپنے گھر چلی گئی۔ بعد ازاں شوہر نے اقرار کیا کہ وہ 18 سال کی عمر سے اس کی ماں کے ساتھ ناجائز تعلق میں ہے۔

یہ انکشاف اس کے لیے نہ صرف دل توڑنے والا تھا بلکہ ذہنی طور پر تباہ کن بھی، کیونکہ اب وہ اس الجھن میں ہے کہ کیا اس کے چھوٹے بہن بھائی دراصل اس کے سوتیلے بچے ہیں؟ اس نے یہ بات اپنے والد کو بتائی اور ایک خاندانی تقریب میں سب کے سامنے ظاہر کر دی۔ اس کے بعد اس نے اپنے شوہر سے علیحدگی اختیار کر لی، جبکہ اس کا والد بھی اس کی ماں سے الگ ہو گیا۔

اب الٹا اس کی ماں اسے الزام دے رہی ہے کہ اس نے اس کی زندگی تباہ کر دی۔ یہ واقعہ سوشل میڈیا پر وائرل ہو چکا ہے، اور لوگ اس عجیب و غریب اور دل دہلا دینے والی کہانی پر حیرت زدہ ہیں۔