اسرائیلی حریف سے ہاتھ ملانے سے انکار ٗ مصری کھلاڑی وطن واپس

اسرائیلی حریف سے ہاتھ ملانے سے انکار ٗ مصری کھلاڑی وطن واپس

ریو ڈی جنیرو (این این آئی)برازیل کے شہر ریو میں اولمپکس حکام کے مطابق مصر کے جوڈو کے کھلاڑی اسلام الشہابی کو ان کے ملک واپس بھیج دیا گیا ہے۔میڈیا رپورٹ کے مطابق اسلام الشہابی نے اپنے اسرائیلی حریف کھلاڑی سے ہاتھ ملانے سے انکار کر دیا تھا گذشتہ ہفتے جوڈو کے ہیوی ویٹ مقابلے کے پہلے راؤنڈ میں اسلام الشہابی کو اسرائیلی کھلاڑی اور سیسن نے شکست دی تھی تاہم مقابلے کے بعد الشہابی نے ہاتھ ملانے اور روایتی طور پر جھکنے سے انکار کر دیا تھا ۔غیر ملکی میڈیا کے مطابق انٹرنیشنل اولمپک کمیٹی کے ترجمان نے ڈسپلنری کمیشن کے اجلاس کے بعد بتایا کہ مصر کی اولمپک کمیٹی نے اسلام الشہابی کے اس فعل کی سخت مذمت کی ہے اور انھیں گھر واپس بھیج دیا ہے۔

ڈسپلنری کمیشن کے مطابق اس کھلاڑی کا رویہ کھیل اور اولمپک کی دوستانہ اقدار کے منافی تھا اس کے ساتھ ساتھ کمیشن نے مصر کی اولمپک کمیٹی کو کھلاڑیوں کو اولمپک مقابلوں میں شرکت سے قبل اولمپکس کی اقدار کے حوالے سے مطلع کرنے اور مستقبل میں اس قسم کے کسی واقعہ سے بچاؤ کو یقینی بنانے کی تلقین کی ۔خیال رہے کہ 32 سالہ اسلام الشہابی نے 2010 میں عالمی چمپئن شپ میں طلائی تمغہ حاصل کیا تھا اور انھیں سوشل میڈیا پر اور ان کے آبائی ملک میں شدت پسند حلقوں کی جانب سے اس مقابلے سے دست بردار ہونے کیلئے دباؤ کا سامنا بھی تھا۔

مزید : کھیل اور کھلاڑی